കണ്ണൂര്‍: പൊതുയോഗങ്ങള്‍, ഉത്സവങ്ങള്‍, ആഘോഷങ്ങള്‍ തുടങ്ങിയ പരിപാടികളുടെ പ്രചാരണവുമായി ബന്ധപ്പെട്ട് ഫഌക്‌സ് ബോര്‍ഡുകള്‍ സ്ഥാപിക്കുന്നത് ഒഴിവാക്കാന്‍ ജില്ലാ ആസൂത്രണ സമിതി യോഗത്തില്‍ കലക്ടര്‍ മീര്‍ മുഹമ്മദലി ജനങ്ങളോട് അഭ്യര്‍ഥിച്ചു. ഇതുമായി ബന്ധപ്പെട്ട് മതസ്ഥാപന മേധാവികള്‍ ഉള്‍പ്പെടെയുള്ളവരുടെ യോഗം വിളിക്കും. റോഡരികുകളിലും മറ്റും ബാനറുകളും കൊടിതോരണങ്ങളും സ്ഥാപിക്കുന്നവര്‍ പരിപാടികള്‍ കഴിഞ്ഞാലുടന്‍ അവ എടുത്തുമാറ്റണമെന്നും അദ്ദേഹം പറഞ്ഞു. ഹരിതകേരള മിഷന്റെ ഭാഗമായി ജില്ലയിലെ മുഴുന്‍ പൊതു-സ്വകാര്യ കുളങ്ങള്‍ ശുചീകരിക്കുന്നതിനു മുന്നോടിയായി അതിനാവശ്യമായ എസ്റ്റിമേറ്റ് തയാറാക്കാന്‍ തദ്ദേശ സ്ഥാപനങ്ങള്‍ക്ക് ഡി.പി.സി യോഗം നിര്‍ദേശം നല്‍കി.