കൂത്തുപറമ്പ്: സ്‌കൂട്ടറില്‍ കടത്തിക്കൊണ്ടുവരികയായിരുന്ന 150ഗ്രാം കഞ്ചാവുമായി യുവാവിനെ എക്‌സൈസ് സംഘം അറസ്റ്റു ചെയ്തു. കൊട്ടിയൂരിലെ സീത എന്ന ടൈറ്റസി(34)നെയാണ് കൂത്തുപറമ്പ് എക്‌സൈസ് ഇന്‍സ്‌പെക്ടര്‍ വി രാജേന്ദ്രനും സംഘവും ഇന്നലെ രാവിലെ കൊട്ടിയൂരില്‍ അറസ്റ്റു ചെയ്തത്. കര്‍ണാടകയില്‍ നിന്നു കൊണ്ടുവരുന്ന കഞ്ചാവ് ചെറിയ പൊതികളാക്കി കേളകം, കൊട്ടിയൂര്‍, ചുങ്കക്കുന്ന് ഭാഗങ്ങളില്‍ സ്‌കൂള്‍ വിദ്യാര്‍ഥികള്‍ക്കും മറ്റുമായി വില്‍പന നടത്തുകയാണ് ഇയാളുടെ പതിവെന്നും മറ്റൊരു കഞ്ചാവു കേസില്‍പെട്ട് കഴിഞ്ഞ ദിവസമാണ് ഇയാള്‍ റിമാഡ് കഴിഞ്ഞ് ജാമ്യത്തിലിറങ്ങിയതെന്നും എക്‌സൈസ് ഉദ്യോഗസ്ഥര്‍ പറഞ്ഞു. എക്‌സൈസ് ഇന്‍സ്‌പെക്ടര്‍ എ.എസ് പുരുഷോത്തമന്‍, പ്രിവന്റീവ് ഓഫിസര്‍ പ്രജീഷ് കുന്നുമ്മല്‍, രാധാകൃഷ്ണന്‍, സി.ഇ.ഒമാരായ യു ഷാജി, പ്രജീഷ് കോട്ടായി, സനലേഷ്, പ്രനില്‍ കുമാര്‍, ചന്ദ്രശേഖരന്‍, സുകേഷ് സംഘത്തിലുണ്ടായിരുന്നു.