സുല്‍ത്താന്‍ബത്തേരി: കാലവര്‍ഷം വയനാട്ടില്‍ ജൂണ്‍ നാലിനകം ആരംഭിക്കുമെന്ന് കാലവസ്ഥാ ശാസ്ത്രജ്ഞന്‍ ഡോ. സുനില്‍ പറഞ്ഞു. തിരുവനന്തപുരത്ത് കാലവര്‍ഷം രണ്ട് ദിവസം നേരത്തെ തുടങ്ങും. ഇത്തവണ കനത്തമഴയും കാറ്റിനും സാധ്യതയുണ്ട്. വാഴകര്‍ഷകര്‍ ഇപ്പോള്‍ തന്നെ മുന്‍കരുതലെടുക്കണമെന്നും നെല്‍പാടങ്ങളില്‍ പൊടിവിളകൃഷി ഇത്തവണ സാധ്യമാകില്ലെന്നും പറയുന്നു. മഴ കൃത്യമായി തുടങ്ങുമെങ്കിലും നേരത്തെ അവസാനിക്കാനുള്ള സാധ്യതയുണ്ട്. ഓഗസ്റ്റ്-സെപ്റ്റംബര്‍ മാസത്തോടെ മഴ അവസാനിക്കും.
സാധാരണ ഒക്ടോബര്‍ മാസം വരെ മഴ ലഭിക്കാറുണ്ട്. കാലാവസ്ഥയില്‍ വന്ന വ്യതിയാനം മൂലമാണിത് സംഭവിക്കുന്നത്. ഇത്തവണ മഴ കൂടുതല്‍ ലഭിച്ചാലും വേനല്‍ കനക്കും. തുടക്കത്തില്‍ തന്നെ ചൂട് 30 ഡിഗ്രി സെല്‍ഷ്യല്‍സില്‍ ആരംഭിക്കാനാണ് സാധ്യത. അങ്ങിനെ സംഭവിച്ചാല്‍ അടുത്ത വര്‍ഷം ചൂട് നാല്‍പ്പത് ഡിഗ്രിക്ക് മുകളിലാവും. മഴവെള്ളം പരമാവധി സംഭരിക്കാനാവശ്യമായ നടപടികള്‍ സ്വീകരിക്കേണ്ടതാണ്. കൃഷിയിടങ്ങളില്‍ മഴക്കുഴികളും തിട്ടകളുമുണ്ടാക്കിയിടണം. ഈ മഴക്കാലം തൊട്ടുപിറകെ വരുന്ന കടുത്ത വേനലിനെ അതിജീവിക്കാനുള്ള ജലസംരക്ഷണത്തിനുള്ള മാര്‍ഗമായി കാണണമെന്നും മണ്ണൂത്തി അഗ്രികള്‍ച്ചറല്‍ യൂനിവേഴ്‌സിറ്റി കാലാവസ്ഥാ ശാസ്ത്രജ്ഞനായ ഡോ. സുനില്‍ പറഞ്ഞു.