തിരൂര്‍: മലയാള ഭാഷാപിതാവ് തുഞ്ചത്തെഴുത്തച്ഛന്റെ സമാധിദിനമായ ഇന്നു തിരൂര്‍ തുഞ്ചന്‍പറമ്പില്‍ തുഞ്ചന്‍ ദിനം ആചരിക്കും. ഓറല്‍ഹിസ്റ്ററി റിസര്‍ച്ച് ഫൗണ്ടേഷന്റെ ആഭിമുഖ്യത്തിലാണ് ദിനാചരണം. രാവിലെ 9.30ന് കൃഷ്ണശിലാ മണ്ഡപത്തില്‍ പുഷ്പാര്‍ച്ചനയോടെ തുടക്കമാകും.
10ന് കവിയും ഗാനരചയിതാവുമായ എസ്. രമേശന്‍ നായര്‍ ഉദ്ഘാടനം ചെയ്യും. തിരൂര്‍ നഗരസഭാ ചെയര്‍മാന്‍ അഡ്വ. എസ്. ഗിരീഷ് അധ്യക്ഷനാകും. തുഞ്ചത്തെഴുത്തച്ഛന്‍ സൃഷ്ടിച്ച സാംസ്‌കാരിക വിപ്ലവം എന്ന വിഷയത്തില്‍ പ്രൊഫ. എം.ജി.എസ് നാരായണന്‍ അനുസ്മരണ പ്രഭാഷണം നടത്തും. തൃക്കണ്ടിയൂര്‍ അച്യുതപിഷാരടി പുരസ്‌കാരം കോഴിക്കോട് കാശ്യപാശ്രമ ഉപജ്ഞാതാവ് ആചാര്യ എം.ആര്‍ രാജേഷിന് രമേശന്‍ നായര്‍ സമര്‍പ്പിക്കും. തിരൂര്‍ ദിനേശ് രചിച്ച വെട്ടത്തു നാട് ഐതിഹ്യവും ചരിത്രവും, മാമാങ്കം ഐതിഹ്യവും ചരിത്രവും, മാപ്പിള ലഹള സത്യവും മിഥ്യയും എന്നീ പുസ്തകങ്ങളുടെ പ്രകാശനവും ചടങ്ങില്‍ നടക്കും. വെട്ടത്ത് രാജവംശത്തിലെ അംഗം മനോജ് വര്‍മ, നിര്‍മല കുട്ടികൃഷ്ണന്‍, ഡോ. കുമാരി സുകുമാരന്‍, ജമാല്‍ ചേന്നര പങ്കെടുക്കും.
തുടര്‍ന്നു തൃപ്പൂണിത്തുറ ആര്‍.എല്‍.വി കോളജിലെ അവസാനവര്‍ഷ നൃത്തവിദ്യാര്‍ഥിനികളായ കൃഷ്ണാ ദിനേശ്, അലീഷ കൃഷ്ണ എന്നിവര്‍ രമേശന്‍ നായരുടെ തെരഞ്ഞെടുത്ത ഗാനങ്ങളുടെ നൃത്താവിഷ്‌ക്കാരം നടത്തും.