കോഴിക്കോട്: ജില്ലയിലാദ്യമായി തുടങ്ങുന്ന തപാല്‍ വകുപ്പിന്റെ ഇന്ത്യാ പോസ്റ്റ് എ.ടി.എം ഇന്ന് മുതല്‍ പ്രവര്‍ത്തനമാരംഭിക്കും. സിവില്‍ സ്റ്റേഷനിലും മാനാഞ്ചിറയിലെ ഹെഡ് പോസ്റ്റ് ഓഫിസിലുമാണ് പ്രാരംഭഘട്ടത്തില്‍ എ.ടി.എമ്മുകള്‍ തുടങ്ങിയത്. സിവില്‍ സ്റ്റേഷനിലെ എ.ടി.എം രാവിലെ 10ന് ജില്ലാ കലക്ടര്‍ എന്‍. പ്രശാന്ത് ഉദ്ഘാടനം ചെയ്യും.
ഏതു പോസ്റ്റ് ഓഫിസിലും അക്കൗണ്ടുള്ളവര്‍ക്ക് എ.ടി.എം വഴി പണം പിന്‍വലിക്കാം. സ്വന്തം പേര് ചേര്‍ത്തതും അല്ലാത്തതുമായ എ.ടി.എം കാര്‍ഡുകള്‍ പോസ്റ്റ് ഓഫിസില്‍ നിന്ന് ലഭിക്കും. ആവശ്യപ്പെട്ടാലുടന്‍ പേരില്ലാത്ത ഇന്‍സ്റ്റന്റ് കാര്‍ഡുകള്‍ പോസ്റ്റ് ഓഫിസില്‍ നിന്ന് ലഭിക്കുന്ന രീതിയിലാണ് സംവിധാനിച്ചിരിക്കുന്നത്.  തിരുവനന്തപുരം, കൊച്ചി, തൃശൂര്‍ തുടങ്ങിയ നഗരങ്ങളില്‍ തപാല്‍ വകുപ്പ് നേരത്തേ എ.ടി.എമ്മുകള്‍ തുടങ്ങിയിരുന്നു.