മഞ്ചേരി: മഞ്ചേരിയില്‍ രണ്ടാഴ്ചയ്ക്കുള്ളില്‍ നടന്നതു മൂന്നു ഗതാഗത പരിഷ്‌കാരങ്ങള്‍. ഇതുമൂലം സാധാരണ ജനങ്ങള്‍ നട്ടംതിരിയുന്ന അവസ്ഥയിലാണിപ്പോള്‍. നഗരത്തിലെത്തുന്ന രോഗികള്‍ ഉള്‍പ്പെടെയുള്ള നൂറുകണക്കിനു യാത്രക്കാരാണ് അടിക്കടിയുള്ള ഗതാഗത പരിഷ്‌കാരത്തില്‍ പ്രതിസന്ധിയിലായിരിക്കുന്നത്.
സെപ്റ്റംബര്‍ 20നു ചേര്‍ന്ന ട്രാഫിക്ക് റഗുലേറ്ററി കമ്മിറ്റി തീരുമാന പ്രകാരം പെരിന്തല്‍മണ്ണ, മലപ്പുറം ഭാഗത്തുനിന്നു മഞ്ചേരിയില്‍ വന്നുപോകേണ്ട ബസുകള്‍ കച്ചേരിപ്പടി സ്റ്റാന്‍ഡില്‍ ആളെയിറക്കി തിരിച്ച് സര്‍വിസ് നടത്തണമെന്നതായിരുന്നു തീരുമാനം. എന്നാല്‍, റഗുലേറ്ററി കമ്മിറ്റിയുടെ തീരുമാനത്തിനെതിരേ ഒരു വിഭാഗം ഹൈക്കോടതിയെ സമീപ്പിക്കുകയും സ്റ്റേ സമ്പാദിക്കുകയും ചെയ്തു. ഇതിനു ശേഷമാണ് തുടരെ മാറ്റങ്ങള്‍ ഉണ്ടായത്.
ഇതിനിടെ റഗുലേറ്ററി കമ്മിറ്റിയുടെ മറ്റു തീരുമാനങ്ങള്‍ നടപ്പാക്കണമെന്ന് ആവശ്യപ്പെട്ട് ഒരു വിഭാഗം വീണ്ടും കോടതിയെ സമീപ്പിച്ചതിനെ തുടര്‍ന്നു നഗരത്തിലെ ഗതാഗത ക്രമീകരണത്തില്‍ വീണ്ടും മാറ്റങ്ങള്‍ വരുത്തുകയായിരുന്നു. എന്നാല്‍, ഇതിനെതരേ വ്യാപാരികള്‍ രംഗത്തുവന്നു. ബസുകള്‍ നഗരത്തില്‍ പ്രവേശിക്കുന്നതു തടയുന്നതിലൂടെ മഞ്ചേരി നഗരത്തെ തകര്‍ക്കുകയും മെഡിക്കല്‍ കോളജിലെത്തുന്ന രോഗികള്‍ ഉള്‍പ്പെടെയുള്ളവര്‍ക്കു കടുത്ത ദുരിതം വിതയ്ക്കുകയും ചെയ്യുകയാണെന്നു ചൂണ്ടിക്കാട്ടി വ്യാപാരികള്‍ രംഗത്തുവന്നതോടെ മഞ്ചേരി സി.ഐ ബിജുവിന്റെ നേതൃത്വത്തില്‍ ചര്‍ച്ച നടത്തുകയും ഒടുവില്‍ മലപ്പുറം, പെരിന്തല്‍മണ്ണ ബസുകള്‍ മലപ്പുറം റോഡുവഴി പോകുന്നതിന് അനുമനതി നല്‍കുകയും ചെയ്തു.
എന്നാല്‍, കഴിഞ്ഞ തിങ്കളാഴ്ച വീണ്ടും കോടതിയുടെ ഇടപെടലുണ്ടാകുകയും മലപ്പുറം, തിരൂര്‍, പെരിന്തല്‍മണ്ണ ബസുകള്‍ ഐ.ജി.ബി.ടി തുറക്കല്‍, ഗവ ഗേള്‍സ് സ്‌കൂള്‍, സെന്‍ട്രല്‍ ജങ്ഷന്‍വഴി എസ്.എച്ച്. ബി.ടി സ്റ്റാന്‍ഡില്‍ പ്രവേശിക്കുന്ന രീതി നടപ്പാക്കുകയുമായിരുന്നു.