പള്ളിക്കല്‍: കാക്കഞ്ചേരി കിന്‍ഫ്രാ പാര്‍ക്കില്‍ ജനവാസകേന്ദ്രത്തോട് ചേര്‍ന്നുള്ള സ്വകാര്യസ്ഥാപനത്തിന്റെ ആഭരണ നിര്‍മാണശാലക്കെതിരേയുള്ള ജനകീയ സമരത്തിന്റെ രണ്ടാം വാര്‍ഷികദിനത്തില്‍ പ്രതിഷേധം ആളിപ്പടര്‍ന്നു. പരിസര സംരക്ഷണസമിതിയുടെ നേതൃത്വത്തില്‍ നടത്തിയ പ്രതിഷേധ പ്രകടനത്തില്‍ സ്ത്രീകളും കുട്ടികളും ഉള്‍പ്പെടെ നൂറുകണക്കിനാളുകള്‍ പങ്കെടുത്തു. ജനകീയസമരം മൂന്നാം വര്‍ഷത്തിലേക്ക് കടക്കുമ്പോള്‍ വിവിധ രാഷ്ട്രീയ സാംസ്‌കാരിക സംഘടനകളുടെ പിന്തുണയോടെ സമരം ശക്തിപ്പെടുത്തുന്നതിന്റെ ഭാഗമായി 31ന് ബൈക്ക് റാലിയും ജനുവരി ഒന്നിന് പ്രകടനവും പൊതുയോഗവും സംഘടിപ്പിക്കും.