പാട്ടവയല്‍: വീട്ടിമരവുമായി ലോറി വനംവകുപ്പിന്റെ പിടിയിലായി. പാട്ടവയല്‍ അമ്മന്‍കാവിന് സമീപം ഇന്നലെ രാവിലെ ആറോടെ ടാര്‍പായ കൊണ്ട് മൂടിയ നിലയില്‍ നാട്ടുകാരാണ് ലോറി കണ്ടത്. തുടര്‍ന്ന് ഇവര്‍ ബിദര്‍ക്കാട് റെയ്ഞ്ച് ഓഫിസില്‍ വിവരമറിയിക്കുകയായിരുന്നു. ബിദര്‍ക്കാട് റെയ്ഞ്ചര്‍ മനോഹരന്‍, ഗാര്‍ഡ് രാജേഷ് എന്നിവര്‍ സ്ഥലത്തെത്തി ലോറി പരിശോധിച്ചു. ഇതോടെയാണ് വീട്ടി മരം കേരളത്തിലേക്ക് കടത്താനുള്ള ശ്രമമാണെന്ന് മനസിലായത്. രാത്രി അതിര്‍ത്തി കടക്കാന്‍ ശ്രമിക്കുന്നതിനിടെ വാഹനം തകരാറിലായതിനെ തുടര്‍ന്ന് വാഹനം ഉപേക്ഷിച്ച് ആളുകള്‍ കടന്നുകളഞ്ഞതാകാമെന്ന നിഗമനത്തിലാണ് വനംവകുപ്പ്. വാഹനവും മരങ്ങളും ബിദര്‍ക്കാട് റെയ്ഞ്ച് ഓഫിസിലേക്ക് മാറ്റിയിട്ടുണ്ട്. ഇതുമായി ബന്ധപ്പെട്ട് കൂടുതല്‍ അന്വേഷണങ്ങള്‍ നടത്തുമെന്ന് റെയ്ഞ്ചര്‍ മനോഹരന്‍ പറഞ്ഞു.