മനാമ: പ്രമുഖ പ്രവാസി എഴുത്തുകാരനും പ്രഭാഷകനുമായ ശംസുദ്ദീന്‍ വെള്ളികുളങ്ങര രചിച്ച 'പൊര കൂട വീട്' എന്ന പുസ്തകത്തിന്റെ പ്രകാശനം കെ.എം.സി.സി യുടെ ബഹ്‌റൈന്‍ ദേശീയ ദിനാഘോഷ സമാപന സമ്മേളന വേദിയില്‍ നടക്കും. നാളെ ഇസാ ടൗണ്‍ ഇന്ത്യന്‍ സ്‌കൂളില്‍ നടക്കുന്ന ചടങ്ങില്‍ പാണക്കാട് സയ്യിദ് സാദിഖലി ശിഹാബ് തങ്ങള്‍ പുസ്തക പ്രകാശനം നിര്‍വഹിക്കും.

തൊണ്ണൂറുകള്‍ വരെ പതിയെ സഞ്ചരിച്ച കാലം പൊടുന്നനെ കുതിച്ചു പാഞ്ഞപ്പോള്‍ കൈവിട്ടുപോയ നാട്ടിന്‍ പുറത്തിന്റെ ഓര്‍മകളും വാക്കുകളും അര്‍ഥങ്ങളും രേഖപ്പെടുത്തിയിട്ടുള്ള ഇന്നലെകളുടെ ഈടുവെപ്പാണ് ഈ കൃതി. പുതിയ തലമുറയ്ക്ക് അന്യമായിപ്പോയ നാട്ടിന്‍ പുറത്തിന്റെ നന്മയും ഓര്‍മകളും ഉണര്‍ന്നു നിര്‍ക്കുന്ന ഓര്‍മ കുറിപ്പുകളുടെ സമാഹാരത്തിനു പ്രമുഖ പ്രഭാഷകന്‍ എം പി അബ്ദുസ്സമദ് സമദാനിയാണ് അവതാരിക എഴിതിയിരിക്കുന്നത്.

കോഴിക്കോട് ജില്ലയില്‍ വടകരക്കടുത്ത് വെള്ളികുളങ്ങര സ്വദേശിയായ ശംസുദ്ദീന്‍ ചന്ദ്രിക ദിനപത്രം, വാരാന്തപ്പതിപ്പ്, തൂലിക, പ്രബോധനം, മാധ്യമം തുടങ്ങിയ പ്രസിദ്ധീകരണങ്ങളില്‍ ധാരാളം ഫീച്ചറുകളും ലേഖനങ്ങളും കുറിപ്പുകളും എഴുതി.
ജീവന്‍ ടി വി യില്‍ ഒരുമാസം തുടര്‍ച്ചയായി സംപ്രേഷണം ചെയ്ത 'റംസാന്‍ നിലാവ് ' പ്രോഗ്രാമിന്റെ രചനയും സംവിധാനവും നിര്‍വഹിച്ചു. തുടര്‍ന്ന് കൈരളി പീപ്പിള്‍, ഏഷ്യാനെറ്റ് ന്യൂസ്, ദര്‍ശന ചാനലുകളിലും പ്രോഗ്രാമുകളുമായി ദൃശ്യ മാധ്യമ രംഗത്തു സജീവമായി. റേഡിയോ കുറിപ്പുകളുടെ നിരവധി തവണ ശ്രോതാക്കളെ ആകര്‍ഷിച്ചു. തമാം, ജ്വലനം എന്നീ ഓഡിയോ കാസ്സെറ്റുകളിലൂടെ ഗാനരചനയുംനിര്‍വഹിച്ചു. ഇപ്പോള്‍ ബഹറിനില്‍ കെ എം സി സി ഓര്‍ഗനൈസിങ് സെക്രട്ടറിയായി പ്രവര്‍ത്തിക്കുന്നു.

എം ബിജുശങ്കര്‍, പി ഹരീന്ദ്രന്‍ മാസ്റ്റര്‍ എന്നിവരുടെ പഠനവും പുസ്തകത്തില്‍ ഉള്‍പ്പെടുത്തിയിട്ടുണ്ട്. മുക്താര്‍ ഉദരംപൊയിലാണു കവര്‍ ഡിസൈന്‍ ചെയ്തിരിക്കുന്നത്. വര ആപ്പിള്‍ തങ്കശ്ശേരി. നസീര്‍പാണക്കാട്ടാണ് രൂപകല്‍പ്പന. ഒലിവ് പബ്ലിക്കേഷനാണു പ്രസാധകര്‍.