എടവണ്ണപ്പാറ: സമസ്തയുടെ രൂപീകരണം മുതല്‍ മുശാവറ അംഗവും രണ്ടര പതിറ്റാണ്ട് കാലം പ്രസിഡന്റുമായിരുന്ന റഈസുല്‍ മുഹഖിഖീന്‍ കണ്ണിയത്ത് ഉസ്താദിന്റെ ഇരുപത്തിനാലാം ഉറൂസിന് ചൊവ്വാഴ്ച തുടക്കമാവും. ചൊവ്വാഴ്ച രാവിലെ പത്തിന് സമസ്ത ട്രഷററും സ്വാഗതസംഘം ചെയര്‍മാനുമായ സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പതാക ഉയര്‍ത്തുന്നതോടെയാണ് ഏഴ് ദിവസം നീണ്ടുനില്‍ക്കുന്ന  മഖാം ഉറൂസിന് തുടക്കമാവുക . ചൊവ്വ മുതല്‍ ഞായര്‍ വരെ വൈകുന്നേരം ഏഴിന് നടക്കുന്ന മതപ്രഭാഷണം   യഥാക്രമം സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍,മുനവ്വറലി ശിഹാബ് തങ്ങള്‍,അബ്ബാസലി ശിഹാബ് തങ്ങള്‍,സ്വാബിഖലി ശിഹാബ് തങ്ങള്‍ ,റഷീദലി ശിഹാബ് തങ്ങള്‍ എന്നിവര്‍ ഉദ്ഘാടനംചെയ്യും.
ജനുവരി രണ്ട് തിങ്കളാഴ്ച രാവിലെ എട്ടിന് നടക്കുന്ന സമാപന പ്രാര്‍ത്ഥന സംഗമം സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനാകും.സയ്യിദ് നാസര്‍ ഹയ്യ് തങ്ങള്‍,സയ്യിദ് മുഹമ്മദ് കോയ തങ്ങള്‍ ജമലുല്ലൈലി ,ആലിക്കുട്ടി മുസ്‌ലിയാര്‍, എം.ടി അബ്ദുള്ള മുസ്‌ലിയാര്‍, അബ്ദുല്‍ ഹമീദ് ഫൈസി അമ്പലക്കടവ് തുടങ്ങിയവര്‍ പ്രസംഗിക്കും. അബ്ദുസ്സമദ് പൂക്കോട്ടൂര്‍ അനുസ്മരണ പ്രഭാഷണം നടത്തും. വാവാട് കുഞ്ഞിക്കോയ മുസ്‌ലിയാര്‍ സമാപന പ്രാര്‍ത്ഥനക്ക് നേതൃത്വം നല്‍കും.കാല്‍ ലക്ഷം പേര്‍ക്ക് അന്നദാനവും നടത്തും.