മട്ടാഞ്ചേരി: ബിനാലെ, പുതുവല്‍സരാഘോഷം എന്നിവയുടെ മറവില്‍ ഫോര്‍ട്ട്‌കൊച്ചിയിലേക്കു കടല്‍ മാര്‍ഗം ലഹരി വസ്തുക്കള്‍ എത്തുന്നത് തടയുന്നതിന്റെ ഭാഗമായി എക്‌സൈസ് മറൈന്‍ എന്‍ഫോഴ്‌സ്‌മെന്റ് സംയുക്തമായി ജലയാനങ്ങളില്‍ പരിശോധന നടത്തി.
രാവിലെ 11നാരംഭിച്ച പരിശോധന ഉച്ചയ്ക്ക് ഒന്നര വരെ നീണ്ടു. ഇരുപതോളം മല്‍സ്യബന്ധന യാനങ്ങളില്‍ പരിശോധന നടത്തിയെങ്കിലും ലഹരി വസ്തുക്കള്‍ ഒന്നും തന്നെ കണ്ടെത്താനായില്ല. അതേസമയം കേരള തീരത്ത് മല്‍സ്യബന്ധനം നടത്തുന്നതിനുള്ള അനുമതിയില്ലാതെ മീന്‍ പിടിച്ച ഒരു ബോട്ട് പരിശോധനയില്‍ കണ്ടെത്തി. സെന്റ് ലൂയീസ് എന്ന ബോട്ടാണ് പിടികൂടിയത്. ഈ ബോട്ട് അധികൃതര്‍ പിടികൂടി പിഴയീടാക്കിയ ശേഷം വിട്ടയച്ചു. മല്‍സ്യബന്ധന യാനങ്ങള്‍ക്ക് പുറമേ മറ്റ് ജലയാനങ്ങളും പരിശോധനക്ക് വിധേയമാക്കി. ആഘോഷങ്ങളുടെ മറവില്‍ കൊച്ചിയിലേക്കു വന്‍ തോതില്‍ ലഹരി വസ്തുക്കള്‍ എത്താന്‍ സാധ്യതയുണ്ടെന്ന റിപ്പോര്‍ട്ടിനെ തുടര്‍ന്നാണ് പരിശോധന ആരംഭിച്ചത്.
കഴിഞ്ഞ ബിനാലെ സമയത്താണ് ഫോര്‍ട്ട്‌കൊച്ചിയില്‍ നിന്ന് കൊക്കെയിന്‍ ഉള്‍പ്പെടെ പിടിച്ചെടുത്തത്. ഈ സാഹചര്യത്തിലാണ് സംയുക്തമായി പരിശോധന നടത്തിയത്. പരിശോധനയ്ക്ക് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.പി.ജോര്‍ജ്, മറൈന്‍ എന്‍ഫോഴ്‌സ്‌മെന്റ് എസ്.ഐ.ഇ.പി.ശരത് ചന്ദ്രന്‍, എക്‌സൈസ് ഇന്‍സ്‌പെക്ടര്‍ പി.മോഹനന്‍, പ്രിവന്റീവ് ഓഫീസര്‍ പി.എല്‍.ജോര്‍ജ്ജ്, ഗാര്‍ഡുമാരായ റിയാസ്, ബിബിന്‍ ബോസ്,ശ്രീജിത്ത്, അരുണ്‍, മാനുവല്‍, മഹേഷ് തുടങ്ങിയവര്‍ നേതൃത്വം നല്‍കി. പരിശോധന തുടരുമെന്ന് ഉദ്യോഗസ്ഥര്‍ വ്യക്തമാക്കി.