കല്‍പ്പറ്റ: കല്‍പ്പറ്റ നഗരസഭാ ചെയര്‍പേഴ്‌സണായി മുസ്്‌ലിംലീഗ് കൗണ്‍സിലര്‍ ഉമൈബ മൊയ്തീന്‍ കുട്ടി അധികാരമേറ്റു. നഗരസഭാ കൗണ്‍സില്‍ ഹാളിന്‍ നടന്ന തെരഞ്ഞെടുപ്പില്‍ സി.പി.ഐ സ്വതന്ത്ര അജി ബഷീറിനെ പരാജയപ്പെടുത്തിയാണ് ഉമൈബ ചെയര്‍പേഴ്‌സണായി തെരഞ്ഞെടുക്കപ്പെട്ടത്. ഉമൈബക്ക് പതിനാറും അജി ബഷീറിനും പന്ത്രണ്ടും വോട്ടുകള്‍ ലഭിച്ചു.
വൈസ് ചെയര്‍മാനായി കോണ്‍ഗ്രസിലെ പി.പി ആലി തെരഞ്ഞെടുക്കപ്പെട്ടു. മുന്‍ ചെയര്‍പേഴ്‌സണ്‍ ബിന്ദു ജോസാണ് ഉമൈബ മൊയ്തീന്‍ കുട്ടിയുടെ പേര് നിര്‍ദേശിച്ചത്. അഡ്വ. ടി.എം ഐസക് പിന്‍താങ്ങി. സഹകരണ ജോയിന്റ് രജിസ്ട്രാര്‍ വത്‌സരാജ് തെരഞ്ഞെടുപ്പ് നിയന്ത്രിച്ചു.
ചാത്തോത്ത് വയലില്‍ നിന്ന് ജനവിധി തേടിയ ഉമൈബ, മൂന്നാം തവണയാണ് നഗരസഭാ കൗണ്‍സിലറാവുന്നത്. കഴിഞ്ഞ ഭരണസമിതിയില്‍ ക്ഷേമകാര്യ സ്്റ്റാന്‍ഡിങ് കമ്മിറ്റി അധ്യക്ഷയായിരുന്നു. വനിതാ ലീഗ് ജില്ലാ വൈസ് പ്രസിഡന്റ്, കല്‍പ്പറ്റ മുനിസിപ്പല്‍ വനിതാ ലീഗ് പ്രസിഡന്റ് എന്നീ പദവികളും വഹിക്കുന്നുണ്ട്. കല്‍പ്പറ്റ അമ്പിലേരി സ്വദേശിനിയാണ്. ഭര്‍ത്താവ്: മൊയ്തീന്‍. മക്കള്‍: വാഹിദ ഷാജി, ഹര്‍ഷാദ്. ഇത് രണ്ടാംതവണയാണ് പി.പി ആലി നഗരസഭയിലേക്ക് തെരഞ്ഞെടുക്കപ്പെടുന്നത്. ആദ്യതവണയിലെ വിജയത്തില്‍ ആദ്യ രണ്ടര വര്‍ഷം ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാനായ ആലി തുടര്‍ന്നുള്ള രണ്ടര വര്‍ഷം നഗരസഭാ ചെയര്‍മാനായിരുന്നു. ഇത്തവണ ആദ്യ വര്‍ഷം വികസനകാര്യ സ്റ്റാന്‍ഡിങ് കമ്മിറ്റി ചെയര്‍മാനായിരുന്നു പി.പി ആലി.