കൊയിലാണ്ടി: പര്‍ദ്ദ ധരിച്ചെത്തിയ വിദ്യാര്‍ഥിനികളെ അപമാനിച്ചതായി പരാതി. കൊയിലാണ്ടി കോതമംഗലം സ്‌കൂളിലാണ് സംഭവം. കഴിഞ്ഞ ദിവസം ഉച്ചയോടെ അധ്യാപക പരിശീലനത്തിനായി എത്തിയ ബദ്‌രിയ്യ ആര്‍ട്‌സ് ആന്‍ഡ് അറബിക് കോളജിലെ വിദ്യാര്‍ഥിനികളെയാണ് സ്‌കൂളിലെ പ്രധാനാധ്യാപിക അപമാനിക്കുകയും മോശമായി പെരുമാറുകയും ചെയ്തതായി പരാതിയുയര്‍ന്നിരിക്കുന്നത്. പര്‍ദ്ദ ധരിച്ചെത്തിയതിനെയും ടീച്ചര്‍ ചോദ്യം ചെയ്തതായി വിദ്യാര്‍ഥിനികള്‍ പരാതിയില്‍ പറയുന്നു. പര്‍ദ്ദയും മഫ്തയും ധരിച്ചതിന്റെ പേരില്‍ വിദ്യാര്‍ഥിനികളെ ഇറക്കിവിട്ടതായും പരാതിയുണ്ട് . എന്നാല്‍ പരിശീലനത്തിനെത്തിയ വിദ്യാര്‍ഥിനികളെ താന്‍ അപമാനിച്ചിട്ടില്ലെന്നും ഈ വേഷത്തിലാണോ പരിശീലനത്തിനെത്തുക എന്നും എ.ഇ.ഒയുടെ അനുമതി വേണമെന്നുമാണ് പറഞ്ഞതെന്നും പ്രധാനാധ്യാപിക 'സുപ്രഭാത'ത്തോട് പറഞ്ഞു.