കഴക്കൂട്ടം: പള്ളിപ്പുറത്ത് ടെക്‌നോസിറ്റിയുടെ ഭാഗമായി നടക്കുന്ന നിര്‍മാണ പ്രവര്‍ത്തനങ്ങള്‍ ഒരു സംഘം തടസ്സപ്പെടുത്തി. വ്യാഴാഴ്ച രാവിലെ പത്തുമണിയോടെയാണ് നിര്‍മാണ പ്രവര്‍ത്തനങ്ങള്‍ തടസ്സപ്പെടുത്തിയത്.
ടെക്‌നോസിറ്റിയില്‍ ത്രിബിള്‍ ഐ.ടി.എം.കെ. എന്ന കമ്പനിയുടെ നിര്‍മാണ പ്രവര്‍ത്തനമാണ് തടസപ്പെടുത്തിയത്. രാവിലെ സ്ഥലത്ത് എത്തിയ അമ്പതോളം പേര്‍ വരുന്ന സംഘം തങ്ങള്‍ക്ക് തൊഴില്‍ നല്‍കണമെന്നാവശ്യപ്പെട്ടു. ശേഷം കരാറുകാരായ ഉത്തരേന്ത്യന്‍ തൊഴിലാളികളെ വിരട്ടിയോടിക്കുകയും തുടര്‍ന്ന് പണി നിര്‍ത്തി വയ്പ്പിക്കുകയുമായിരുന്നു.
കൊല്‍ക്കത്ത ആസ്ഥാനമായിട്ടുള്ള കണ്‍സ്ട്രഷന്‍ കമ്പനിയാണ് നിര്‍മാണ പ്രവര്‍ത്തനങ്ങള്‍ എാറ്റെടുത്തിരിക്കുന്നത്. പരിചയസമ്പന്നരായ തൊഴിലാളികളെ വച്ചാണ് ഇവിടെ നിര്‍മ്മാണം നടത്തുന്നത്. അതിനാല്‍ പുറത്ത് നിന്നുള്ളവര്‍ക്ക് തൊഴില്‍ നല്‍കാന്‍ കഴിയില്ലെന്നാണ് കമ്പനി അധികൃതര്‍ പറയുന്നത്.
സംഭവത്തെ തുടര്‍ന്ന് ചിറയിന്‍കീഴ് അസി: ലേബര്‍ ഓഫിസര്‍ക്ക് പരാതി നല്‍കി. പണി തടസപ്പെടുത്തിയവര്‍ ആരാണെന്ന് വ്യക്തമായിട്ടില്ലെന്ന് കരാറുകാര്‍ പറഞ്ഞു