തിരുവനന്തപുരം: കാട്ടാക്കട മണ്ഡലത്തിലെ ജലക്ഷാമം പരിഹരിക്കുന്നതിനുള്ള ജലസമൃദ്ധി പദ്ധതിയിന്‍കീഴില്‍ വരുന്ന എല്ലാ പഞ്ചായത്തുകളിലും പുതിയ കുളങ്ങള്‍ നിര്‍മിക്കും.
ഓരോ പഞ്ചായത്തിലേയും ഒരു പൊതുസ്ഥാപനത്തിന് മഴക്കുഴി നിര്‍മിക്കുന്നതിനും കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ജലസമൃദ്ധി അവലോകനയോഗത്തില്‍ തീരുമാനമായി.
ഉപയോഗശൂന്യമായി കിടക്കുന്ന കുളങ്ങളുടെ നവീകരണത്തിന് ജനപ്രതിനിധികളുടെ നേതൃത്വത്തില്‍ സന്നദ്ധ പ്രവര്‍ത്തകര്‍ മുന്നിട്ടിറങ്ങും. പഞ്ചാത്ത്, വാര്‍ഡ്, അയല്‍ക്കൂട്ട ജാഗ്രതാസമിതികളുടെ യോഗം ഈ മാസം 31 ന് മുന്‍പ് പൂര്‍ത്തിയാക്കും. മണ്ഡലത്തിലെ എല്ലാ പഞ്ചായത്ത് വാര്‍ഡുകളിലും നടക്കുന്ന ജലവിഭവ സര്‍വെ ജനുവരി അഞ്ചിന് പൂര്‍ത്തിയാക്കാനും തീരുമാനിച്ചു.
നികത്തപ്പെട്ടോ കൈയേറിയോ അന്യാധീനപ്പെട്ട കുളങ്ങള്‍ വീണ്ടെടുക്കുന്നതിനും നടപടി സ്വീകരിക്കും. ജലസമൃദ്ധി പദ്ധതിയുടെ കീഴില്‍ വരുന്ന മാറനല്ലൂര്‍, മലയിന്‍കീഴ്, വിളപ്പില്‍, പള്ളിച്ചല്‍, കാട്ടാക്കട പഞ്ചായത്തുകളില്‍ ആദ്യഘട്ടമായി ഓരോ കുളങ്ങള്‍ നവീകരിക്കുന്നതിനും തീരുമാനമായി.
മാറനല്ലൂരിലെ പെരുങ്കുളം, മലയിന്‍കീഴ് ഇളമണ്‍ മഠം, വിളവൂര്‍ക്കല്‍ തുറവൂര്‍ കുളം, വിളപ്പില്‍ മിണ്ണന്‍കോട് കുളം, പള്ളിച്ചല്‍ ചിറക്കുളം, കാട്ടാക്കട ചേലക്കാട്ട്കുളം എന്നീ കുളങ്ങളാണ് നവീകരിക്കുക.
വിവിധ വകുപ്പുകളുടെ ഏകോപനത്തോടെയാണ് പദ്ധതി പൂര്‍ത്തിയാക്കുക. പദ്ധതി പൂര്‍ത്തിയാകുമ്പോള്‍ മണ്ഡലത്തിലെ എല്ലാ ജലസ്രോതസുകളും നവീകരിക്കുകയും റീചാര്‍ജ് ചെയ്യുകയും ചെയ്യും.
യോഗത്തില്‍ ഐ.ബി. സതീഷ് എം.എല്‍.എ, ജില്ലാ കലക്ടര്‍ എസ്. വെങ്കടേസപതി, പഞ്ചായത്ത് പ്രസിഡന്റുമാര്‍, വിവിധ ജില്ലാതല ഉദ്യോഗസ്ഥന്മാര്‍, ബി.ഡി.ഒ മാര്‍, വിവിധ വകുപ്പുകളുടെ പ്രതിനിധികള്‍ എന്നിവര്‍ പങ്കെടുത്തു.