പെരിന്തല്‍മണ്ണ: നെഞ്ചിനകത്തു കാണപ്പെട്ട തൈറോയിഡ് മുഴ കിംസ് അല്‍ശിഫ ആശുപത്രിയില്‍ അപൂര്‍വ ശസ്ത്രക്രിയയിലൂടെ പുറത്തെടുത്തു. കഴിഞ്ഞ ദിവസം അസഹ്യമായ ശ്വാസതടസവും നിര്‍ത്താതെയുള്ള ചുമയും മൂലം നിലമ്പൂര്‍ കാളികാവ് സ്വദേശിയായ അറുപതുകാരി ചികിത്സയ്ക്കായി പള്‍മണോളജി വിഭാഗത്തില്‍  ഡോ. ടോണി ലൂക്ക് ബേബിയെ സമീപിക്കുകയായിരുന്നു.
തുടര്‍ന്നു നടത്തിയ വിശദമായ പരിശോധനയില്‍ നെഞ്ചിന്റെ ഉള്ളില്‍ ഹൃദയത്തിലേക്കു പോകുന്ന പ്രധാന രക്തധമനികളുടെ ഇടയില്‍ സ്ഥിതിചെയ്യുന്ന നിലയില്‍ മുഴ കാണപ്പെടുകയും ഇതു റെസ്‌ട്രോസ്‌റ്റേണല്‍ ഗോയിറ്ററാണെന്ന് ബോധ്യപ്പെടുകയുമായിരുന്നു. പിന്നീട് ഇ.എന്‍.ടി വിഭാഗം മേധാവി  ഡോ. അഭിലാഷ് എ. ഫ്രാന്‍സിസ്, ഇ.എന്‍.ടി സ്‌പെഷലിസ്റ്റ് ഡോ. അംജദ് ഫാറൂഖ്, അനസ്‌തെറ്റിസ്റ്റ് ഡോ. ഷാനില്‍ ജോസ് എന്നിവരുടെ നേതൃത്വത്തില്‍ ദൈര്‍ഘ്യമേറിയ ശസ്ത്രിക്രിയയിലൂടെയാണ് ഇതു പുറത്തെടുത്തത്.
തൈറോയിഡ് മുഴ കാണപ്പെടുന്ന രോഗികളില്‍ 1.3 ശതമാനം മാത്രമാണ് ഈ അപൂര്‍വ രോഗാവസ്ഥയുള്ളത്. നിലവില്‍ മലബാറില്‍ ചുരുക്കം ചില ആശുപത്രികളില്‍ മാത്രമാണ് ഇതിനു ചികിത്സയുള്ളതെന്നു വാര്‍ത്താ സമ്മേളനത്തില്‍ കിംസ് അല്‍ശിഫ വൈസ്‌ചെയര്‍മാന്‍ പി. ഉണ്ണീന്‍, ചീഫ് ഓപ്പറേറ്റിങ് ഓഫിസര്‍ ഡോ. റിയാസ് ഖാന്‍, ഡോ. അഭിലാഷ് എ. ഫ്രാന്‍സിസ്, ഡോ. ടോണി ലൂക്ക് ബേബി, ഡോ. അംജദ് ഫാറൂഖ്, ഡോ. ഷാനില്‍ ജോസ് എന്നിവര്‍ അറിയിച്ചു.