നിലമ്പൂര്‍: പള്ളിയുടെ സംഭാവനപ്പെട്ടി പൊളിച്ചു മോഷണം നടത്തിയ കേസില്‍ പ്രതി പൊലിസ് പിടിയിലായി. തൃക്കണാപുരം തവനൂര്‍ സ്വദേശി കൊത്തുവാള്‍ പറമ്പില്‍ മുഹമ്മദ് അബൂബക്കറാ(45) ണ് നിലമ്പൂര്‍ പൊലിസിന്റെ പിടിയിലായത്.
കഴിഞ്ഞ സെപ്റ്റംബര്‍ ആദ്യവാരത്തിലാണ് നിലമ്പൂര്‍ കോവിലകം റോഡിലെ ജുമാമസ്ജിദിലെ സംഭാവനപ്പെട്ടി കുത്തിപ്പൊളിച്ച് ഇരുപതിനായിരത്തോളം രൂപ മോഷ്ടിച്ചത്. തുടര്‍ന്ന് എസ്.ഐ മനോജ് പറയറ്റയുടെ നേതൃത്വത്തിലുള്ള സംഘം നടത്തിയ അന്വേഷണത്തിലാണ് പ്രതിയെ പിടികൂടിയത്. അഡീഷണല്‍ എസ്.ഐ വി.പി അബൂബക്കര്‍, പൊലിസ് ഓഫിസര്‍മാരായ ഒ. മനോജ്, ഗോപാലന്‍ എന്നിവരും അന്വേഷണ സംഘത്തിലുണ്ടായിരുന്നു.
കൊയിലാണ്ടിയിലെ പാറപ്പള്ളിയില്‍ മോഷണം നടത്തിയതിനു പിടികൂടി ചോദ്യം ചെയ്തപ്പോഴാണ് നിലമ്പൂരിലെ സംഭവം തെളിഞ്ഞത്. പള്ളിയില്‍ മോഷണം നടത്തിയതിന് പാണ്ടിക്കാട് സ്‌റ്റേഷനിലും കേസുണ്ട്. സബ്ജയിലിയായിരുന്ന പ്രതിയെ ഇന്നലെ തെളിവെടുപ്പിനായി നിലമ്പൂരില്‍ കൊണ്ടുവന്നു. എസ്.ഐ വി.പി അബൂബക്കറാണ് പ്രതിയെ അറസ്റ്റ് ചെയ്തത്. ഇന്നു കോടതിയില്‍ ഹാജരാക്കും.