മലപ്പുറം: ബൈക്ക് പെയിന്റ് ചെയ്തു നിറംമാറ്റി ഉപയോക്താവിനെ കബളിപ്പിച്ചെന്ന പരാതിയില്‍ ഹോണ്ട ഡീലര്‍ക്കെതിരേ ഉപഭോക്തൃ ഫോറം ഉത്തരവ്. പരാതിക്കാരനു പുതിയ ഹോണ്ട യൂനികോണ്‍ ബൈക്ക് നല്‍കാനും പതിനായിരം രൂപ ചെലവിലേക്കു നല്‍കാനുമാണ് വിധി.
അല്ലാത്തപക്ഷം 50,000 രൂപ നഷ്ടപരിഹാരവും ചെലവിലേക്കായി 10,000 രൂപയും നല്‍കണം. കൊച്ചി ഇ.വി.എം ഹോണ്ടക്കെതിരേയാണ് മലപ്പുറം ഉപഭോക്തൃഫോറം ഉത്തരവിട്ടത്. തിരൂര്‍ മാറാക്കര സ്വദേശി ആലസ്സംപാട്ടില്‍ ജാഫറിന്റെ പരാതിയിലാണ് ഉത്തരവ്. 2011 ഏപ്രില്‍ 11നാണ് ജാഫര്‍ ഇ.വി.എം ഹോണ്ടയില്‍നിന്നു കറുപ്പ് യൂനികോണ്‍ ബൈക്ക് വാങ്ങിയത്. എന്നാല്‍, ചുവപ്പ് ബൈക്കില്‍ കറുപ്പ് നിറത്തിലുള്ള പെയിന്റ് അടിച്ചു നല്‍കുകയായിരുന്നു.
വിവരം ബോധ്യപ്പെട്ട ജാഫര്‍ ഉപഭോക്തൃ ഫോറത്തെ സമീപിക്കുകയായിരുന്നു. ഇ.വി.എം ഹോണ്ട വിതരണക്കാരെയും ഹരിയാനയിലെ ഹോണ്ട കമ്പനിയെയും എതിര്‍കക്ഷികളാക്കിയാണ് ജാഫര്‍ പരാതി നല്‍കിയത്. പരാതിക്കാരനു വേണ്ടി അഡ്വ. സാദിഖ് നടുത്തൊടി ഹാജരായി. ആംനസ്റ്റി ഇന്റര്‍ നാഷനല്‍ ഇന്ത്യന്‍ ചാപ്റ്റര്‍ അംഗവും പി.സി ജോര്‍ജിന്റെ ജനപക്ഷ മുന്നണിയുടെ യുവജന വിഭാഗമായ യുവജനപക്ഷം സംസ്ഥാന ജനറല്‍ സെക്രട്ടറിയുമാണ് ജാഫര്‍.