ഫറോക്ക്: കാമ്പസും ക്ലാസുകളും ശുചീകരിച്ച് വ്യത്യസ്തമായി പുതുവല്‍ത്സരത്തിനു സ്വാഗതമോതി ഫാറൂഖ് കോളജ് വിദ്യാര്‍ഥികള്‍. കോളജ് വിദ്യാര്‍ഥി യൂനിയന്റെ നേതൃത്വത്തിലാണ് രണ്ടു ദിവസങ്ങളിലായി കാമ്പസ് വൃത്തിയാക്കിയത്.

വിദ്യാര്‍ഥികള്‍ക്കൊപ്പം അധ്യാപകരും അനധ്യാപക ജീവനക്കാരും പങ്കാളികളായി. ശുചീകരണ പ്രവര്‍ത്തനങ്ങളുടെ ഉദ്ഘാടനം കേരള ലീഗല്‍ സര്‍വീസ് അതോറിറ്റി ചെയര്‍മാനും കോഴിക്കോട് ജില്ലാ സബ് ജഡ്ജുമായ ആര്‍.എല്‍ ബൈജു നിര്‍വ്വഹിച്ചു. പൊതു സമൂഹത്തിന് മികച്ച സന്ദേശമാണ് ഈ പ്രവര്‍ത്തനത്തിലൂടെ വിദ്യാര്‍ഥികള്‍ നല്‍കിയിരിക്കുന്നതെന്ന് അദ്ദേഹം പറഞ്ഞു.

ചടങ്ങില്‍ യൂനിയന്‍ ചെയര്‍മാന്‍ പി.വി ഫാഹിം അഹമ്മദ് അധ്യക്ഷത വഹിച്ചു. കമറുദിന്‍ പരപ്പില്‍, ഇ.കെ സാജിദ്, മൈമൂന, ശാലിന ബീഗം, യൂണിയന്‍ സെക്രട്ടറി ഹാഫിസ് മുഹ്‌സിന്‍, ഷുഹൈബ് മുഖദാര്‍, നൂഹ, സി.എച്ച് മുഹമ്മദ്, നാജിയ, അനസ് മാവൂര്‍, ലബീബ്, അസ്ഹര്‍ എന്നിവര്‍ നേതൃത്വം നല്‍കി.