മുക്കം: രാഷ്ട്രീയ സമ്മര്‍ദത്തിന് വഴങ്ങി കസ്റ്റഡിയിലെടുത്ത പ്രതികളെ പൊലിസ് വെറുതെ വിട്ടതായി പരാതി. നടമ്മല്‍ പൊയില്‍, അമ്പലക്കണ്ടി, നാഗാളികാവ്, കെടയത്തൂര്‍, പുത്തൂര്‍, കുളത്തക്കര  എന്നീ പ്രദേശങ്ങളില്‍ ഇരുട്ടിന്റെ മറവില്‍ മുസ് ലിം ലീഗിന്റെയും സമസ്തയുടെയും  ബി.ജെ.പിയുടെയും ബോര്‍ഡുകളും കൊടിയും സ്തൂപങ്ങങ്ങളും വ്യാപകമായി നശിപ്പിച്ച സംഭവത്തില്‍ കൊടുവള്ളി പൊലിസ് കസ്റ്റഡിയിലെടുത്ത പ്രതികളെയാണ് പൊലിസ് വെറുതെ വിട്ടത്.
അമ്പലക്കണ്ടി സ്വദേശി  ഇസ്മാഈല്‍,  പുത്തൂര്‍ സ്വദേശികളായ അജേഷ്, പ്രതീഷ് എന്നിവരെയാണ്  കൊടുവള്ളി പൊലിസ് കസ്റ്റഡിയിലെടുത്ത് വെറുതെ വിട്ടത്. മൂന്നാഴ്ച മുന്‍പ് നടമ്മല്‍പൊയില്‍ യൂത്ത് ലീഗ് സമ്മേളനത്തോടനുബന്ധിച്ച് ഇവിടെ സ്ഥാപിച്ചിരുന്ന അനേകം ബോര്‍ഡുകളും തോരണങ്ങളും നശിപ്പിക്കുകയും കുടിവെള്ളത്തിനായി ഉപയോഗിക്കുന്ന വിവിധ കിണറുകളില്‍ ഉപേക്ഷിക്കുകയും ചെയ്തിരുന്നു.
കഴിഞ്ഞ ഞായറാഴ്ച രാത്രിയും ഇവിടങ്ങളില്‍ ലീഗിന്റെയും സമസ്തയുടെയും ബോര്‍ഡുകളും മറ്റും വ്യാപകമായി തകര്‍ത്തു. കൂട്ടത്തില്‍ നാഗാളി കാവില്‍ ബി.ജെ.പിയുടെ കൊടിമരവും കുളത്തക്കരയില്‍ പുതുതായി പണിത വാദീനൂര്‍ ഇസ്‌ലാമിക് സെന്റര്‍ മസ്ജിദിന്റെ  ബോര്‍ഡും വാട്ടര്‍ ടാപ്പുകളും തകര്‍ത്തിരുന്നു. ഈ പ്രദേശങ്ങളിലൊക്കെ സമസ്തയുടെയും യൂത്ത് ലീഗിന്റെയും ബി.ജി.പിയുടെയും  നേതൃത്വത്തില്‍ പ്രതിഷേധ പ്രകടനവും പൊതുയോഗവും നടന്നിരുന്നു.
ഓമശ്ശേരി:കഴിഞ്ഞ ദിവസം ഓമശ്ശേരി മേഖലയിലെ വിവിധ സ്ഥലങ്ങളില്‍ ഇരുട്ടിന്റെ മറവില്‍ സംഘടയുടെ ബോര്‍ഡുകളും ഫ്‌ലക്‌സുകളും നശിപ്പിച്ച സാമൂഹ്യദ്രോഹികളെ കസ്റ്റഡിയിലെടുത്ത ശേഷം   രാഷ്ട്രീയ സമ്മര്‍ദ്ദത്തിന് വഴങ്ങി  വെറുതെ വിട്ട പൊലിസ് നടപടി പ്രതിഷേധാര്‍ഹമാണന്ന് എസ്.കെ.എസ്. എസ്.എഫ് ഓമശ്ശേരി മേഖലാ കമ്മിറ്റി യോഗം അഭിപ്രായപ്പെട്ടു. യോഗത്തില്‍ പ്രസിഡന്റ് പി.ടി മുഹമ്മദ് കാതിയോട് അധ്യക്ഷനായി.
സംസ്ഥാന ഓര്‍ഗനൈസിങ് സെക്രട്ടറി കുഞ്ഞാലന്‍കുട്ടി ഫൈസി ഉദ്ഘാടനം ചെയ്തു. നിസാം ഓമശ്ശേരി, മുനീര്‍ കൂടത്തായ്, ഗഫൂര്‍ മുണ്ടുപാറ,സിദ്ധീഖ് നടമ്മല്‍ പോയില്‍, ജലീല്‍ ഫൈസി പുറായില്‍, അഷ്‌റഫ് ജാറംകണ്ടി, മുസ്തഫ അശ്അരി കണിയാറംകണ്ടം, സാദിഖ് സ്വാലിഹി മേപ്പള്ളി, സംസാരിച്ചു. ഹാരിസ് മുഹമ്മദ് ഹൈതമി സ്വാഗതവും സയീദ് ഓമശ്ശേരി നന്ദിയും പറഞ്ഞു.
ഓമശ്ശേരി: നാട്ടില്‍  സമാധാനാന്തരീക്ഷം തകര്‍ക്കാന്‍ ശ്രമം നടത്തിയവരെ മാതൃകാ പരമായി ശിക്ഷിക്കണമെന്ന് നടമ്മല്‍ ടൗണ്‍ യൂത്ത് ലീഗ് കമ്മിറ്റി ആവശ്യപ്പെട്ടു.വാര്‍ഡ് മുസ്‌ലിം ലീഗ് ജനറല്‍ സെക്രട്ടറി ടി.എന്‍ അബ്ദുറസാഖ് ഉദ്ഘാടനം ചെയ്തു. കെ.പി കുഞ്ഞിമുഹമ്മദ് അധ്യക്ഷനായി. ആര്‍.കെ മുഹമ്മദ്, ഐ.പി നാസര്‍, കെ.പി ജാബിര്‍ ,മനാഫ് ചളിക്കോട്, ജൗഹര്‍ കൊയിലാട്ട്, അബൂബക്കര്‍ മാസ്റ്റര്‍, ബുജൈര്‍, ഇര്‍ഫാന്‍, അജ്മല്‍ സംസാരിച്ചു.
പ്രതികളെ മാതൃകാപരമായി ശിക്ഷിക്കണമെന്ന് കുളത്തക്കര യൂനിറ്റ് യൂത്ത് ലീഗ് കമ്മിറ്റി ആവശ്യപ്പെട്ടു.എ.കെ റഹദ് അധ്യക്ഷനായി. സ്വാലിഹ് കാവുങ്ങല്‍, ടി.ടി ജംഷിദ്, ടി.പി അജാസ്, ജുനു, എന്‍.നിലോ ഫാര്‍ , എ.കെ ബാദുഷ, പി.കെ ഷഫീഖ്, ലിജാസ് എന്നിവര്‍ സംസാരിച്ചു.