പൊന്നാനി: അത്യാസന്നനിലയില്‍ ചികില്‍സ തേടിയെത്തിയ രോഗിയെ ചികിത്സിക്കാന്‍ തയാറാകാതെ ഡോക്ടര്‍ മടക്കി അയച്ചതായി പരാതി. പൊന്നാനി താലൂക്ക് ആശുപത്രിയിലാണ് സംഭവം. അഡ്മിറ്റ് ചെയ്യണമെങ്കില്‍ സ്വകാര്യ ഡോക്ടര്‍മാരുടെ അനുമതി വേണമെന്ന വിചിത്ര വാദമുന്നയിച്ചാണ് ഡോക്ടര്‍ ചികിത്സ നിഷേധിച്ചത്.
എടപ്പാള്‍ നടുവട്ടം സ്വദേശിയായ പാത്തുണ്ണി എന്ന രോഗിക്കാണ് ചികിത്സ നിഷേധിച്ചത്. ഹൃദയസംബന്ധമായ രോഗത്തനു നേരത്തേ ഇവര്‍ ത്യശൂരിലെ സ്വകാര്യ ആശുപത്രിയില്‍ ചികിത്സയിലായിരുന്നു. പണത്തിന് ഏറെ ബുദ്ധിമുട്ടായതോടെ ഇവര്‍ പൊന്നാനി താലൂക്ക് ആശുപത്രിയില്‍ ചികിത്സ തേടിയെത്തി.
എന്നാല്‍, ഡ്യൂട്ടിയിലുണ്ടായിരുന്ന ഡോക്ടര്‍ ഇവര്‍ക്കു ചികിത്സ നിഷേധിക്കുകയായിരുന്നുവെന്നാണ് പരാതി. ഡ്യൂട്ടി കഴിഞ്ഞ് സ്വകാര്യ പ്രാക്ടീസ് നടത്തുന്ന മറ്റൊരു ഡോക്ടറെ കാണാനാണ് ഇവര്‍ ആവശ്യപ്പെട്ടത്. തുടര്‍ന്ന് അത്യാസന്ന നിലയിലായ ഈ രോഗിയെ ആംബുലന്‍സിലാണ് സ്വകാര്യ പ്രാക്ടീസ് നടത്തുന്ന ഡോക്ടറുടെ അടുത്തെത്തിച്ചത്. അവിടെ കനത്ത തിരക്കായതിനാല്‍ ഏറെനേരം കഴിഞ്ഞാണ് ഇവര്‍ക്ക് ചികിത്സ ലഭിച്ചത്.
സംഭവം വിവാദമായതോടെ ഡോക്ടര്‍ക്കെതിരേ നടപടിയെടുക്കുമെന്നു താലൂക്ക് ആശുപത്രി സൂപ്രണ്ട് അറിയിച്ചു. ഇത്തരം സംഭവങ്ങള്‍ മേലില്‍ ആവര്‍ത്തിക്കാന്‍ അനുവദിക്കില്ലെന്നും സൂപ്രണ്ട് പറഞ്ഞു. സംഭവത്തിന്റെ നിജസ്ഥിതി അന്വേഷിച്ച് റിപ്പോര്‍ട്ട് നല്‍കാന്‍ പൊന്നാനി നഗരസഭാ ചെയര്‍മാന്‍ സൂപ്രണ്ടിനോട് ആവശ്യപ്പെട്ടിട്ടുണ്ട്.