നിലമ്പൂര്‍: ജില്ലയിലെ മികച്ച സ്‌കൂള്‍ പച്ചക്കറി തോട്ടത്തിനുള്ള ഒന്നാംസ്ഥാനം വെളിയംതോട് ഇന്ദിരഗാന്ധി സ്മാരക മോഡല്‍ റസിഡന്‍ഷ്യല്‍ സ്‌കൂളിന്. പ്രാക്തന ഗോത്ര വിഭാഗക്കാരായ കാട്ടു നായ്ക്കര്‍, ഗുഹാ നിവാസികളായ ചോലനായ്ക്കര്‍ എന്നിവരുടെ സ്‌കൂളിനാണ് പ്രഥമ പുരസ്‌കാരം കിട്ടിയതെന്നതു ശ്രദ്ധേയമാണ്.
സ്‌കൂളിലെ അധ്യാപകന്‍ അനില്‍കുമാറും കൃഷി ഓഫിസര്‍ ഷക്കീലയും നിരന്തരമായ പ്രേത്സാഹനം നല്‍കിയാണ് കുട്ടികളെ കൃഷിയിലേക്കു തല്‍പരരാക്കിയത്. ഒന്നോക്കാല്‍ ഏക്കര്‍ സ്ഥലത്ത് 14 ഇനം വിഷരഹിത പച്ചക്കറികളാണ് വിളവെടുപ്പ് നടത്തിയത്. അഞ്ഞൂറിനടുത്ത് ഗ്രോബാഗുകളും കുട്ടികള്‍ ഒരുക്കി.
പച്ചക്കറികള്‍ക്ക് പുറമേ പഴങ്ങളും കൃഷി ചെയ്തുവരുന്നുണ്ട്. ജില്ലാ കലക്ടറും കൃഷി വകുപ്പും സാമ്പത്തിക സഹായം നല്‍കിയതിനെ തുടര്‍ന്നാണ് ജൂലൈയില്‍ സ്‌കൂളില്‍ കൃഷി ആരംഭിച്ചത്. ഹോസ്റ്റല്‍ സൗകര്യമുള്ള സ്‌കൂളില്‍ ഇവിടെ നട്ടുണ്ടാക്കുന്ന പച്ചക്കറികളാണ് ഉപയോഗിച്ചുവരുന്നത്. ജില്ലയിലെ മികച്ച കോര്‍ഡിനേറ്റര്‍ക്കുള്ള ബഹുമതിയില്‍ മൂന്നാം സ്ഥാനവും സ്‌കൂളിലെ അധ്യാപകനായ അനില്‍കുമാറിനാണ് ലഭിച്ചത്.