വളാഞ്ചേരി: പ്രണയംനടിച്ചു പതിനഞ്ചുകാരിയെ പീഡിപ്പിച്ച രണ്ടു യുവാക്കളില്‍ ഒരാളെ വളാഞ്ചേരി സി.ഐ കെ.എം സുലൈമാന്‍ അറസ്റ്റ് ചെയ്തു. കരേക്കാട് തൊഴലില്‍ അലി (23 )ആണ് അറസ്റ്റിലായത്. കൂട്ടുപ്രതി കാടാമ്പുഴ മേല്‍മുറി സ്വദേശി റാഫി വിദേശത്തേക്കു കടന്നതായി പൊലിസ് അറിയിച്ചു.
ഒരു മാസം മുന്‍പാണ് സംഭവം. ഫോണില്‍ പരിചയപ്പെട്ട പെണ്‍കുട്ടിയെ അലി പ്രണയംനടിച്ച് വശത്താക്കി. തുടര്‍ന്ന് സുഹൃത്തായ റാഫിയോടൊപ്പം രാത്രിയില്‍ കുട്ടിയുടെ വീട്ടിലെത്തി ഇരുവരും പീഡനത്തിനിരയാക്കുകയായിരുന്നു.
പീഡനം പുറത്തുപറഞ്ഞാല്‍ അപായപ്പെടുത്തുമെന്നു ഭീഷണിപ്പെടുത്തി. തുടര്‍ന്നു പെണ്‍കുട്ടി മാതാവിനോടൊപ്പമെത്തി പൊലിസില്‍ പരാതി നല്‍കി. യുവാക്കള്‍ക്കെതിരേ പോക്‌സോ പ്രകാരം കേസെടുത്തു.തിരൂര്‍ കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. കാടാമ്പുഴ എസ്.ഐ പി.എസ് മഞ്ജിത്‌ലാല്‍, എസ്.സി.പി.ഒമാരായ ഇക്ബാല്‍, ശറഫുദ്ദീന്‍, സുനില്‍ദേവ്, സി.പി.ഒമാരായ പി. കൈലാസ്‌നാഥ്, രഞ്ജുരാജ് എന്നിവരടങ്ങിയ സംഘമാണ് പ്രതിയെ പിടികൂടിയത്.