പാലക്കാട്: കേന്ദ്രം ഭരിക്കുന്ന മോദി സര്‍ക്കാരും സംസ്ഥാനം ഭരിക്കുന്ന പിണറായി ഗവണ്‍മെന്റും ഒരു നാണയത്തിന്റെ ഇരുവശങ്ങളാണെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. പാലക്കാട് ടൗണ്‍ഹാളില്‍ നടന്ന ലീഡര്‍ കെ. കരുണാകരന്‍ അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
നോട്ട് പിന്‍വലിച്ചുകൊണ്ട് പ്രധാനമന്ത്രി  മോദി ജനങ്ങളെ നെട്ടോട്ടം ഓടിച്ചപ്പോള്‍ റേഷന്‍ വിതരണം അട്ടിമറിച്ചാണ് പിണറായി ജനങ്ങളുടെ മേല്‍ പ്രഹരം അടിച്ചേല്‍പ്പിച്ചത്. മോദി പിണറായി വിജയന് പഠിക്കുകയാണോ അതോ വിജയന്‍ മോദിക്ക് പഠിക്കുകയാണോ എന്നാണ് ജനങ്ങള്‍ക്ക് സംശയം. നോട്ടുകൊണ്ട് മോദിയും അരികൊണ്ട് പിണറായും ജനങ്ങളെ നരകതുല്യമാക്കുകയാണ്. കേന്ദ്ര സര്‍ക്കാര്‍ ഇപ്പോള്‍ വാചക കസര്‍ത്ത് മാത്രമാണ് നടത്തുന്നത്.
യു.എ.പി.എ ആദ്യമായി നടപ്പാക്കിയത് കൊടിയേരി ബാലകൃഷ്ണനാണ്. ആര് സര്‍ക്കാരിനെതിരെ പ്രസംഗിച്ചാലും അവര്‍ക്കെതിരെ യു. എ. പി. എ ചുമത്തുകയാണ് പിണറായി ചെയ്യുന്നത്. എന്തിനാണ് ഇത്തരം നടപടി ക്രമങ്ങള്‍ ഇടത് സര്‍ക്കാര്‍ നടത്തുന്നത്. ആഭ്യന്തരമന്ത്രി അറിയാതെ ഇത്തരം നടപടികള്‍ ചുമത്താന്‍ കഴിയില്ല. ഒരുകാലത്തുപോലും ഇതുപോലെ ഒരന്തരീക്ഷം സംസ്ഥാനത്ത് ഉണ്ടായിട്ടില്ല. 124(എ), 153(എ) നടത്താന്‍ യാതൊരു കാരണവശാലും കഴിയില്ല.
പാലക്കാട് ജില്ലയിലെ വടക്കഞ്ചേരിയില്‍ ആദിവാസികളെ പരാതി നല്‍കാന്‍ എത്തിയപ്പോള്‍ പിടികൂടി തുണിയഴിച്ച് പരിശോധിച്ചത് സാംസ്‌കാരിക കേരളത്തിനുതന്നെ അപമാനമാണ്. കോണ്‍ഗ്രസ്  പാര്‍ട്ടി ഇന്ന് ഏറ്റവും വലിയെ വെല്ലുവിളി നേരിടുന്ന സമയമാണ്. ചരിത്രത്തിലെ ഏറ്റവും വലിയ ഏകാധിപതിയാണെന്നും മോദി തെളിയിച്ചുകൊണ്ടിരിക്കുകയാണ്.
സാധാരണക്കാരനായ ജനിച്ച് കേരളത്തിന്റെ ഭരണം കൈവെള്ളയില്‍ ഒതുക്കിയ നേതാവായിരുന്നു ലീഡര്‍ കെ കരുണാകരനെന്ന് രമേശ് ചെന്നിത്തല അനുസ്മരിച്ചു. 1969ല്‍ കോണ്‍ഗ്രസിന് നേതൃത്വം കൊടുത്ത് പ്രസ്ഥാനത്ത് ജനഹൃദയങ്ങളിലെത്തിയ നേതാവായിരുന്നു അദ്ദേഹം. സാധാരണ കോണ്‍ഗ്രസ് പ്രവര്‍ത്തകരുടെ വികാരം ഇത്രയുമേറെ അറിഞ്ഞ ഒരു നേതാവും കോണ്‍ഗ്രസില്‍ ഉണ്ടായിട്ടില്ല. കേരളത്തിന്റെ വികസന കാര്യത്തില്‍ ദീര്‍ഘ ദൃഷ്ടിയായിരുന്നു അദ്ദേഹത്തിന് ഉണ്ടായിരുന്നത്. 2017ല്‍ ഒരുവര്‍ഷം നീണ്ടുനില്‍ക്കുന്ന ജന്മ ശതാബ്ദി ആഘോഷം കേരളത്തിനകത്തും പുറത്തുമായി ഗംഭീരമായി നടത്തുമെന്ന് അദ്ദേഹം കൂട്ടിച്ചേര്‍ത്തു.
വി.കെ ശ്രീകണ്ഠന്‍ അധ്യക്ഷനായി. നേതാക്കളായ വി.എസ് വിജയരാഘവന്‍, സി.വി ബാലചന്ദ്രന്‍, എ രാമസ്വാമി, വി.സി കബീര്‍, കെ.എ ചന്ദ്രന്‍, സി.പി മുഹമ്മദ്, വി.ടി ബലറാം എം.എല്‍.എ, സി ചന്ദ്രന്‍, ശാന്താജയറാം, വിജയന്‍ പൂക്കാടന്‍, ടി.പി. ഷാജി, സി.ടി. സെയ്തലവി, പി.വി. രാജേഷ്, കെ.എസ്.ബി. എ. തങ്ങള്‍, കെ.വി. മരയ്ക്കാര്‍, കെ. ഗോപിനാഥന്‍, എ. സുമേഷ്, കുമാരി സംബന്ധിച്ചു.