പാലക്കാട്: പട്ടികവര്‍ഗ വികസന വകുപ്പിന്റെ ആഭിമുഖ്യത്തില്‍ മോഡല്‍ റസിഡന്‍ഷല്‍ സ്‌ക്കൂള്‍, പ്രീമെട്രിക്ക് ഹോസ്റ്റല്‍ വിദ്യാര്‍ഥികളുടെ കലാമേള 'സര്‍ഗോത്സവം' ഡിസംബര്‍ 29 മുതല്‍ 31 വരെ പാലക്കാട് ഗവ.വിക്‌ടോറിയ കോളജില്‍ നടക്കും. കോളജ് ഗ്രൗണ്ടില്‍ സജ്ജമാക്കുന്ന മൂന്ന് വേദികളിലായി ജൂനിയര്‍, സീനിയര്‍ തലത്തില്‍ 30 ഇനമത്സരങ്ങളാണ് നടക്കുക. 14 ജില്ലകളില്‍ നിന്നുള്ള 18 റസിഡന്‍ഷല്‍ സ്‌ക്കൂളുകളില്‍ നിന്നും 108 പ്രീമെട്രിക് ഹോസ്റ്റലുകളിലും നിന്നായി 1200ഓളം വിദ്യാര്‍ഥികള്‍ പങ്കെടുക്കും.
സംസ്ഥാനത്തെ 37 ആദിവാസി വിഭാഗത്തില്‍പ്പെട്ട വിദ്യാര്‍ഥികളുടെ കഴിവുകള്‍ക്ക് വിക്‌ടോറിയ കോളജ് വേദിയാവും.  കഴിഞ്ഞ മൂന്ന് വര്‍ഷമായി കാസര്‍ഗോഡ് എം.ആര്‍.എസ് ആണ് സര്‍ഗോത്സവ കിരീടം നിലനിര്‍ത്തുന്നത്.