തിരുവനന്തപുരം: നിരവധി ക്രിമിനല്‍ക്കേസുകളിലെ പ്രതിയും ഗുണ്ടാ ആക്ടു പ്രകാരം ജയില്‍ശിക്ഷയനുഭവിച്ചിട്ടുള്ള ചിറയിന്‍കീഴ് തൊപ്പിച്ചന്ത ഗുമസ്ഥന്‍കുന്ന് കാണവിള വീട്ടില്‍ കടകംപള്ളി ബിജു എന്ന ബിജു (32) മെഡിക്കല്‍കോളജ് പൊലിസിന്റെ പിടിയിലായി. കവര്‍ച്ച, കൂലിത്തല്ല തുടങ്ങിയ നിരവധി കേസുകള്‍ ഇയാള്‍ക്കെതിരേയുണ്ട്.  തിരുവനന്തപുരം നഗരത്തിലെ വിവിധ സ്റ്റേഷനുകളിലായി 15 ഓളം കേസുകള്‍ നിലവിലുണ്ട്. വിവിധ ജില്ലകളില്‍ ഒളിവില്‍ക്കഴിഞ്ഞിരുന്ന ഇയാളെ കഴക്കൂട്ടം സൈബര്‍ സിറ്റി എ.സി പ്രമോദ്കുമാറിന്റെ നേതൃത്വത്തില്‍ മെഡിക്കല്‍കോളജ് സി.ഐ സി. ബിനുകുമാര്‍, എസ്.ഐ ഗിരിലാല്‍, എസ്.സി.പി.ഒ വിജയബാബു, സി.പി.ഒമാരായ നസീര്‍, നസീം, അജി എന്നിവര്‍ ചേര്‍ന്നു പിടികൂടിയ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.