താമരശേരി: കോഴിക്കോട് ജില്ലയുടെ  പ്രധാന ജലസ്രോതസ്സായ പൂനൂര്‍പുഴ മുന്‍പെങ്ങുമില്ലാത്ത വിധം നശിച്ചുകൊണ്ടിരിക്കുകയാണ്. വേനല്‍ കനക്കുന്നതോടെ നീരൊഴുക്ക് കുറയുകയും ഇതോടെ ആയിരക്കണക്കിനു കുടുംബങ്ങള്‍ കുടിവെള്ളക്ഷാമത്തിന്റെ പിടിയിലമരുകയുമാണ് പതിവ്. പൂനൂര്‍ പുഴയുടേയും ചെറുപുഴയുടേയും ഭാഗങ്ങളില്‍ വെള്ളം വറ്റുന്നത് ജല അതോറിറ്റിയുടെ വിതരണത്തെയും  സാരമായി ബാധിക്കും. മഴക്കാലത്ത്  നിറഞ്ഞു കവിഞ്ഞ് ഒഴുകിയിരുന്ന പുഴയുടെ പല ഭാഗങ്ങളിലും അനിയന്ത്രിതമായ മണലെടുപ്പ് കാരണം മിക്കയിടത്തും പുഴക്ക് ആഴം കൂടിയിരിക്കുകയാണ്. പുഴക്കു സമീപത്തെ വീടുകളിലെ കിണറുകളില്‍പോലും കുടിവെള്ളം ലഭിക്കാത്ത അവസ്ഥയാണ് നിലവില്‍.  പുഴയില്‍ ചെറുതും വലുതുമായ ഒട്ടേറെ ശുദ്ധജല പമ്പിങ് കേന്ദ്രങ്ങളും ഇരുനൂറോളം പ്രാദേശിക കുടിവെള്ള പദ്ധതികളുമൊക്കെയുണ്ടെങ്കിലും അധികൃതര്‍ പുഴ സംരക്ഷണത്തിന് കൃത്യമായ പദ്ധതികളൊന്നും ഇതുവരെ ആസൂത്രണം ചെയ്തിട്ടില്ല.

പരിസ്ഥിതി ദിനത്തില്‍ ഗ്രാമപഞ്ചായത്തുകളും സ്‌കൂള്‍ വിദ്യാര്‍ഥികളും പുഴയോരത്തെത്തി പ്രതിഞ്ജയെടുക്കലും പ്രഖ്യാപനങ്ങളും നടക്കുന്നതല്ലാതെ അടുത്ത തലമുറകള്‍ക്കും പ്രയോജനപ്പെടേണ്ട പൂനൂര്‍പ്പുഴക്ക് ശാശ്വത സംരക്ഷണത്തിന് പദ്ധതികള്‍ ആവിഷ്‌കരിക്കേണ്ടതുണ്ട്. മാനാഞ്ചിറ കഴിഞ്ഞാല്‍ കോഴിക്കോട് നഗരത്തിലേക്കാവശ്യമുള്ള ജലം സംഭരിക്കുന്നത് പൂനൂര്‍പുഴയിലെ പൂളക്കടവ് ഭാഗത്ത് നിന്നാണ്. വറ്റിക്കൊണ്ടിരിക്കുന്ന പൂനൂര്‍പുഴ സമീപഭാവിയില്‍ നേരിടുന്ന ഏറ്റവും വലിയ തിരിച്ചടിയുടെ പ്രത്യാഘാതം കോഴിക്കോട് നഗരത്തെ വരെ കാര്യമായി ബാധിക്കും. പനങ്ങാട് ,കട്ടിപ്പാറ, ഉണ്ണികുളം, കൊടുവള്ളി, കിഴക്കോത്ത് ഭാഗങ്ങളിലൂടെ ഒഴുകി കോരപ്പുഴയിലേക്കാണു ചേരുന്നത്. അവിടെ നിന്ന് അറബിക്കടലിലേക്ക് ലയിക്കുന്നു.

  അനധികൃത മണലെടുപ്പും പുഴയോരത്തെ വന്‍ തോതിലുള്ള കൈയേറ്റങ്ങളും കരയിടിച്ചിലുമാണ് പുഴയുടെ നാശത്തിന്ന് കാരണമാകുന്നത്. കൂടാതെ പുഴയോരത്ത് വലിയ കിണറുകള്‍ നിര്‍മിച്ച് വന്‍തോതില്‍ പമ്പ് ചെയ്ത് വാഹനങ്ങളിലും മറ്റും എത്തിച്ച് കുടിവെള്ളം വില്‍പ്പന നടത്തുന്ന സംഘങ്ങളും ഇപ്പോള്‍ സജീവമായിട്ടുണ്ട്. പുഴയോരത്തെ മരങ്ങള്‍ മുറിച്ച് വില്‍പ്പന നടത്തുന്ന സംഘവും വിലസുകയാണ്.   സാമൂഹിക ദ്രോഹികള്‍ വലിച്ചെറിഞ്ഞ മാലിന്യകൂമ്പാരങ്ങള്‍  പൂനൂര്‍പുഴയും ചെറുപുഴയുമെല്ലാം മാലിന്യമയമാകാന്‍ ഇടയായിട്ടുണ്ട്.
 പൂനൂര്‍ പുഴയും ചെറുപുഴയുമെല്ലാം സംരക്ഷിക്കുന്നതിന് അതതു പ്രദേശത്ത് ജനകീയമായി പുഴ സംരക്ഷണ സമിതികള്‍  സജീവമാക്കേണ്ടതുണ്ട്.

പുഴയെ മലിനമാക്കുന്നതും മരംകൊള്ളയും പുഴയോര കൈയേറ്റവും തടയുന്നതിലും ജില്ലാ ഭരണകൂടം പരാജയമാണ്. അനധികൃത മണലൂറ്റലിനെതിരേ ശക്തമായ നിലപാട് അധികൃതര്‍ സ്വീകരിക്കേണ്ടിയിരിക്കുന്നു.  പൂനൂര്‍പുഴയുടെ ഇരുകരകളും കെട്ടി സംരക്ഷിക്കാന്‍  കേന്ദ്ര സംസ്ഥാന സര്‍ക്കാരുകളുടെ പുഴ സംരക്ഷണ ഫണ്ടുകള്‍ യഥാസമയം ലഭ്യമാക്കുകയും ഫലപ്രദമായ ഇടപെടലും അനിവാര്യമാണ്.പുഴയില്‍ മാലിന്യം തള്ളുന്നതിനെതിരെയും അനധികൃത മണലൂറ്റിനെതിരെയും ശക്തമായ പ്രതിരോധം തീര്‍ക്കാന്‍ പ്രാദേശിക ഭരണകൂടം നിലപാടെടുക്കണമെന്നാണ് നാട്ടുകാരുടെ ആവശ്യം.