ദോഹ. പെനാല്‍റ്റി ഷൂട്ടൗട്ടില്‍ യുവന്റസിനെ പരാജയപ്പെടുത്തി എസി മിലാന്‍ ഇറ്റാലിയന്‍ സൂപ്പര്‍കപ്പ് കിരീടം സ്വന്തമാക്കി. അല്‍ സദ്ദ് സ്‌പോര്‍ട്‌സ് ക്ലബ്ബിലെ ജാസിം ബിന്‍ ഹമദ് സ്‌റ്റേഡിയത്തില്‍ ഇന്നലെ രാത്രി നടന്ന മത്സരത്തില്‍ ഇരുടീമുകളും ഒരുഗോള്‍ വീതം നേടി തുല്യതപാലിച്ചതിനെത്തുടര്‍ന്നാണ് മത്സരം ഷൂട്ടൗട്ടിലേക്ക് നീണ്ടത്.

മിലാന്റെ നാലു കിക്കുകള്‍ ലക്ഷ്യം കണ്ടപ്പോള്‍ ഒരു കിക്ക് ബഫണ്‍ രക്ഷപ്പെടുത്തി. യുവന്റസിന്റെ മൂന്നു കിക്കുകള്‍ മാത്രമെ ലക്ഷ്യം കണ്ടുള്ളു. ഒരു കിക്ക് പുറത്തേക്കുപോയപ്പോള്‍ ഒരെണ്ണം ഗോളി ജിയാന്‍ലൂജി ഡൊന്നാറുമ്മ രക്ഷപ്പെടുത്തി.

ഏഴാം സൂപ്പര്‍കപ്പ് കിരീടമാണ് മിലാന്‍ സ്വന്തമാക്കിയത്. മത്സരത്തിന്റെ ആദ്യഘട്ടം മുതല്‍ കൊണ്ടും കൊടുത്തുമായിരുന്നു ഇരുടീമുകളും മുന്നേറിയത്. ആദ്യപകുതിയില്‍ യുവന്റസിനായിരുന്നു നേരിയ മുന്‍തൂക്കം. മിലാന്‍ ഗോള്‍മുഖത്ത് തുടര്‍ച്ചയായി ആക്രമണം അഴിച്ചുവിട്ടു. 18ാം മിനിറ്റില്‍ ജോര്‍ജിയോ ചെല്ലിനിയുടെ ഗോളിലൂടെ അവര്‍ മുന്നിലെത്തുകയും ചെയ്തു. യുവന്റസിന്റെ മിറാലെം ജാനിക് വലതുമൂലയില്‍നിന്നെടുത്ത കോര്‍ണര്‍ ബോക്‌സിനു മുന്നില്‍ ചെല്ലിനിയുടെ കാലിനുപാകത്തില്‍. ബോക്‌സിലേക്ക് ഉയര്‍ത്തിയടിച്ച ഷോട്ട് ഗോളിയെയും മറികടന്ന് വലയിലേക്ക്. തൊട്ടടുത്ത മിനിറ്റില്‍ മിലാന്‍ സുവര്‍ണാവസരം നഷ്ടപ്പെടുത്തി.

ബോക്‌സിന്റെ മധ്യത്തില്‍ നിന്നും ആന്ദ്രിയ ബെര്‍ട്ടൊലാസിയുടെ ഹെഡര്‍ പോസ്റ്റിന്റെ ഇടതുമൂലയിലൂടെ പുറത്തേക്കുപോയി. 38ാംമിനിറ്റില്‍ മിലാന്റെ ശ്രമങ്ങള്‍ വിജയം കണ്ടു. ജിയാകോമോ ബൊണവെഞ്ചൂറയാണ് ഹെഡറിലൂടെ മിലാനുവേണ്ടി ഗോള്‍ സ്‌കോര്‍ ചെയ്തത്. സൂസോയുടെ ക്രോസില്‍ ജിയാകോമോ വെച്ച ഹെഡര്‍ ഗോളിയെ കബളിപ്പിച്ച് വലയില്‍കടന്നു. രണ്ടാംപകുതിയില്‍ ഇരുടീമുകളും ആക്രമണത്തിനുകുറച്ചുകൂടി മൂര്‍ച്ചകൂട്ടി.

യുവന്റസിനായിരുന്നു മുന്‍തൂക്കം. മികച്ച അവസരങ്ങള്‍ മിലാനും തുറന്നുകിട്ടി. 54ാം മിനിറ്റില്‍ ഗോളെന്നുറപ്പിച്ച അവസരം ഹിഗ്വയ്ന്‍ പുറത്തേക്കടിച്ച് നഷ്ടപ്പെടുത്തിയപ്പോള്‍ രണ്ടുമിനിറ്റിനുശേഷം മിലാനും സുവര്‍ണാവസരം കളഞ്ഞുകുളിച്ചു. മിലാന്‍ താരത്തിന്റെ ഷോട്ട് ഗോള്‍പോസ്റ്റില്‍ തട്ടിത്തെറിക്കുകയായിരുന്നു. ബാറിനുകീഴില്‍ യുവന്റസ് ഗോളി ബഫണും മികച്ച പ്രകടനം പുറത്തെടുത്തു.

60ാം മിനിറ്റില്‍ സാമി ഖദിരയുടെ മുന്നേറ്റം മിലാന്‍ ഗോള്‍കീപ്പറുടെ കയ്യില്‍ വിശ്രമിച്ചു. ഗോണ്‍സാലോ ഹിഗ്വയ്‌ന്റെ പാസില്‍നിന്നും ഖദിരയുടെ റൈറ്റ് ഫൂട്ടഡ് ഷോട്ടാണ് ഗോളി രക്ഷപ്പെടുത്തിയത്. 65ാംമിനിറ്റില്‍ ഹ്വിഗ്വെയ്‌ന്റെ ഷോട്ടും മിലാന്‍ ഗോളി രക്ഷപ്പെടുത്തി. 76ാം മിനിറ്റില്‍ യുവന്റസിന്റെ പൗളോ ദിബാലയെടുത്ത ലോംഗ് ഷോട്ട് ഗോള്‍പോസ്റ്റിന്റെ വലതുഭാഗം തൊട്ടുരുമ്മി പുറത്തേക്കുപോയി. നിശ്ചിതസമയത്തിന്റെ അവസാനമിനിറ്റുകളില്‍ മിലാന്റെ തുടര്‍ആക്രമണങ്ങള്‍ നിര്‍ഭാഗ്യംകൊണ്ടാണ് ഗോളാകാതിരുന്നത്.

ഗോളെന്നുറപ്പിച്ച മൂന്നു അവസരങ്ങളാണ് മിലാന്‍ പാഴാക്കിയത്. മിലാന്റെ മുന്നേറ്റത്തോടെയാണ് അധികസമയം തുടങ്ങിയതെങ്കിലും യുവന്റസ് ശക്തമായി തിരിച്ചുവന്നതോടെ ആവേശകരമായി. അധികസമയത്തിന്റെ രണ്ടാംപകുതിയില്‍ 113, 114, 115 മിനിറ്റുകളിലായി അഞ്ചു മികച്ച അവസരങ്ങളാണ് യുവന്റസ് പാഴാക്കിയത്. 117ാം മിനിറ്റില്‍ ഹിഗ്വയ്‌ന്റെ മുന്നേറ്റം ഓഫ്‌സൈഡില്‍ കലാശിച്ചു.അവസാനമിനിറ്റില്‍ ഹാന്‍ഡ്‌ബോളിനായി യുവന്റസ് വാദിച്ചെങ്കിലും റഫറി വഴങ്ങിയില്ല. മത്സരം ഷൂട്ടൗട്ടിലേക്ക് കടന്നു.