മലപ്പുറം: സര്‍ക്കാര്‍ നിര്‍ദേശമുണ്ടായിട്ടും മുന്‍ പഞ്ചായത്ത് അംഗങ്ങളുടെ സ്ഥിതിവിവരക്കണക്കുകള്‍ യഥാസമയം സമര്‍പ്പിക്കുന്നതില്‍ വീഴ്ചവരുത്തുന്ന പഞ്ചായത്ത് സെക്രട്ടറിമാര്‍ക്കെതിരേ നടപടി സ്വീകരിക്കണമെന്നു ഫോര്‍മര്‍ പഞ്ചായത്ത് മെമ്പേഴ്‌സ് ഓര്‍ഗനൈസേഷന്‍.
നിരവധി തദ്ദേശ സ്വയംഭരണ സ്ഥാപനങ്ങള്‍ ഇക്കാര്യത്തില്‍ അലംഭാവം കാണിക്കുന്നതുമൂലം മുന്‍ അംഗങ്ങള്‍ക്കു ലഭിക്കേണ്ട പെന്‍ഷന്‍, ആരോഗ്യ ഇന്‍ഷുറന്‍സ് പദ്ധതി തുടങ്ങിയ ആനുകൂല്യങ്ങള്‍ കിട്ടുന്നതിനു തടസവും കാലതാമസവും ഉണ്ടാകുന്നതായും ഈ നില തുടര്‍ന്നാല്‍ പ്രത്യക്ഷ സമരപരിപാടികള്‍ നടത്തുമെന്നും സമിതി അറിയിച്ചു. പ്രസിഡന്റ് കെ.ടി സിദ്ദീഖ് മൗലവി അധ്യക്ഷനായി. കെ.എം അബ്ദു, പി.ടി മൊയ്തീന്‍കുട്ടി മാസ്റ്റര്‍, ഹവ്വാ ഉമ്മ, ബേബി തോമസ്, സത്യഭാമ, എ.പി ഉണ്ണി സംസാരിച്ചു.