പെരിന്തല്‍മണ്ണ: ജീവിതത്തിന്റെ പുറംപോക്കില്‍ കഴിയേണ്ടിവരികയും പഠനംഅപ്രാപ്യമാവുകയും ചെയ്തവര്‍ക്ക് കൈത്താങ്ങൊരുക്കുകയാണ് സര്‍വശിക്ഷാ അഭിയാന്‍.
പാര്‍ശ്വവല്‍കരിക്കപ്പെട്ടവരിലേക്ക് അറിവിന്റെ വെട്ടം എത്തിക്കുന്നതിനായി പഠനവീടൊരുക്കിയാണ് എസ്.എസ്.എ തങ്ങളുടെ ഉത്തരവാദിത്തം നിറവേറ്റുന്നത്. പെരിന്തല്‍മണ്ണ സായി സ്‌നേഹതീരത്തിലാണ് പഠനവീടിന് തുടക്കമായത്.
ആദിവാസി വിഭാഗക്കാരായ കുട്ടികളുടെ പുനരധിവാസ കേന്ദ്രമായ സായി സ്‌നേഹതീരത്തില്‍ പ്രത്യേക വളണ്ടിയറുടെ നേത്വത്തിലാണ് പഠനവീട് പ്രവര്‍ത്തിക്കുക. ഇവിടത്തെ കുട്ടികളെ പഠനത്തില്‍ മറ്റു കുട്ടികള്‍ക്കൊപ്പം എത്തിക്കലാണ് ലക്ഷ്യമിടുന്നത്. പെരിന്തല്‍മണ്ണ ബിആര്‍സിയാണ് പഠനവീട് ഒരുക്കിയിരിക്കുന്നത്. നഗരസഭാ വിദ്യാഭ്യാസ സ്ഥിരസമിതി ചെയര്‍മാന്‍ കിഴിശ്ശേരി മുസ്തഫ പഠനവീട് ഉദ്ഘാടനം ചെയ്തു. കെ.എസ് ഗോപാലകൃഷ്ണന്‍ അധ്യക്ഷനായി.
എസ്.എസ്.എ ജില്ലാ പ്രോജക്ട് ഓഫിസര്‍ പി ശിവദാസന്‍, പ്രോഗ്രാം ഓഫിസര്‍ എന്‍ നാസര്‍, ബി.പി.ഒ പി മനോജ്കുമാര്‍, ട്രെയിനര്‍ സി.ടി ശ്രീജ, കെ.ടി വിജയകുമാര്‍, കെ പ്രസാദ്, എം.പി അംബികാദേവി, വി.കെ രമേശന്‍, കെ.ആര്‍ രവി, സോജന്‍ മലയില്‍ സംസാരിച്ചു.