റിയാദ്: രാജ്യത്തെ പെട്രോള്‍ പമ്പുകള്‍ സ്വയം സേവന സംവിധാനത്തിലേക്ക് മാറ്റുന്നതായി റിപ്പോര്‍ട്ട്. ഇതോടെ പമ്പുകളില്‍ ജീവനക്കാടെ സേവനം ആവശ്യമില്ലാതാവുകയും ഇതുമൂലം നിരവധി പേര്‍ക്ക് തൊഴില്‍ നഷ്ടമാകുകയും ചെയ്യുമെന്നാണ് വിലയിരുത്തല്‍. സെല്‍ഫ് സര്‍വിസ് സ്വഭാവത്തിലുള്ള പെട്രോള്‍ പമ്പുകള്‍ ഏറ്റെടുത്ത നടത്താന്‍ 13 കമ്പനികള്‍ മുന്നോട്ടുവന്നിട്ടുണ്ടെന്ന് തദ്ദേശഭരണ മന്ത്രാലയ പ്രതിനിധി വ്യക്തമാക്കി.
പമ്പുകളിലെ ജോലിക്കാരെ ആശ്രയിക്കാതെ തന്നെ ഡ്രൈവര്‍മാര്‍ക്ക് സ്വന്തമായി ഇന്ധനം നിറക്കാനും പണം നല്‍കാനുമുള്ള നൂതന സംവിധാനമാണ് നടപ്പിലാക്കുന്നത്. തുടക്കത്തില്‍ പരീക്ഷണാടിസ്ഥാനത്തില്‍ നഗരങ്ങളെ തമ്മില്‍ ബന്ധിപ്പിക്കുന്ന ഹൈവേകളിലാണ് പുതിയ സംവിധാനം നടപ്പാക്കുക.
പരീക്ഷണാടിസ്ഥാനത്തില്‍ ചില പെട്രോള്‍ പമ്പുകള്‍ ഇലക്ട്രോണിക് പണമിടപാടും സ്വയംസേവന സംവിധാനവും നിലവില്‍ ആരംഭിച്ചിട്ടുണ്ട്.