പാലക്കാട്: മോട്ടോര്‍ വാഹന വകുപ്പ് നികുതി കുടിശ്ശികയുള്ള വാഹനങ്ങള്‍ക്ക് ഒറ്റത്തവണ നികുതി തീര്‍പ്പാക്കല്‍ പദ്ധതി നടപ്പാക്കുന്നു.
മോഷണംപോയ വാഹനങ്ങള്‍, പൊളിച്ചുകളഞ്ഞ വാഹനങ്ങള്‍, ഉടമസ്ഥാവകാശം മാറ്റാതെ വില്‍പ്പന നടത്തിയ വാഹനങ്ങള്‍, റവന്യു റിക്കവറിയുള്ള വാഹനങ്ങള്‍ എന്നിവയുടെ കുടിശ്ശിക നികുതിയാണ് ഒറ്റത്തവണയായി സ്വീകരിക്കുന്നത്.
2011 ജൂലൈ ഒന്നു മുതല്‍ 2016 ജൂണ്‍ 30 വരെ അഞ്ച് വര്‍ഷമൊ അതില്‍ കൂടുതലൊ നികുതി കുടിശ്ശികയുള്ള വാഹനങ്ങള്‍ക്കാണ് ഒറ്റത്തവണ തീര്‍പ്പാക്കല്‍ പദ്ധതി ബാധകം. അഞ്ചുവര്‍ഷത്തില്‍ കൂടുതല്‍ കുടിശ്ശികയുള്ള ട്രാന്‍സ്‌പോര്‍ട്ട് വാഹനങ്ങള്‍ അവസാനത്തെ അഞ്ചുവര്‍ഷത്തെ നികുതിയും അധികനികുതിയും പലിശയുമുള്‍പ്പെടെ ആകെത്തുകയുടെ 20 ശതമാനവും നോണ്‍ ട്രാന്‍സ്‌പോര്‍ട്ട് വാഹങ്ങള്‍ 30 ശതമാനവും നല്‍കിയാല്‍ മതി.
വാഹനത്തെ സംബന്ധിച്ച് ഉടമക്ക് യാതൊരു വിവരമില്ലെങ്കിലും വാഹനം മോഷണം പോയെങ്കിലും പൊളിച്ചുകളഞ്ഞെങ്കിലും ഒറ്റത്തവണ പദ്ധതി തീര്‍പ്പാക്കല്‍ പ്രകാരം 2016 ജൂണ്‍ 30 വരെയുള്ള കുടിശ്ശികയടച്ചശേഷം 100 രൂപയുടെ മുദ്രപത്രത്തില്‍ സത്യവാങ്മൂലം നല്‍കി 2016 ജൂലൈ ഒന്നുമുതലുള്ള വാഹന നികുതിയില്‍ നിന്ന് ഒഴിവാകാം.
വാഹനയുടമകള്‍ ഈ അവസരം പ്രയോജനപ്പെടുത്തണമെന്ന് റീജയനല്‍ ട്രാന്‍സ്‌പോര്‍ട്ട് ഓഫിസര്‍ അറിയിച്ചു.