തൊടുപുഴ: ശ്രീനാരായണ സന്ദേശം ഉയര്‍ത്തി പിടിച്ച് രാജ്യത്തിന്റെ മുന്നേറ്റത്തിന് ശ്രമിക്കണമെന്ന് മന്ത്രി എം.എം മണി പറഞ്ഞു. എസ്.എന്‍.ഡി.പി യോഗം തൊടുപുഴ യുനിയന്റെ ആഭിമുഖ്യത്തില്‍ വെങ്ങല്ലൂര്‍ ചെറായിക്കല്‍ ശ്രീ സുബ്രഹ്മണ്യ സ്വാമി ക്ഷേത്ര സന്നിധിയില്‍ നിന്നും ആദ്യമായി പുറപ്പെട്ട 84 ാ മത് ശിവഗിരി തീര്‍ഥാടന പദയാത്രയുടെ പതാക ക്യാപ്റ്റനും യൂനിയന്‍ സെക്രട്ടറിയുമായ പി.എസ് സിനിമോന് കൈമാറി സംസാരിക്കുകയായിരുന്നു അദ്ദേഹം.
കേരള സമൂഹത്തില്‍ മാറ്റം വന്നത് ശ്രീനാരായണ പ്രസ്ഥാനങ്ങളുടെയും നവോത്ഥാ നായകരുടെയും പോരാട്ടം കൊണ്ടാണ്. മാറ് മറക്കാനും സ്‌കൂളുകളില്‍ പഠിക്കാനും ഒരു കാലത്ത് അവകാശമില്ലായിരുന്നു. ഇതിനെതിരെ ഗുരുദേവനും ശ്രീനാരായണ പ്രസ്ഥാനങ്ങളും നടത്തിയ മഹത്തായ പോരാട്ടങ്ങളാണ് സമൂഹത്തില്‍ മാറ്റം വരുത്തിയതെന്ന് മണി പറഞ്ഞു.
ചെറായിക്കല്‍ ഗുരുദേവ ഓഡിറ്റോറിയത്തില്‍ നടന്ന ചടങ്ങില്‍ എസ്.എന്‍.ഡി.പി യോഗം കൗണ്‍സിലര്‍ ഷാജി കല്ലാറയില്‍ അധ്യക്ഷത വഹിച്ചു. തൊടുപുഴ യൂനിയന്‍ പ്രസിഡന്റ് അഡ്വ.എസ് പ്രവീണ്‍ ഉദ്ഘാടനവും പദയാത്ര ഫ്‌ലാഗ്ഓഫും നിര്‍വഹിച്ചു. സ്വാമി മഹാ ദേവാനന്ദ പ്രഭാഷണം നടത്തി. യൂണിയന്‍ വൈസ് പ്രസിഡന്റ് ഡി.ബോസ്, പദയാത്ര വൈസ് ക്യാപ്റ്റനും യൂണിയന്‍ കൗണ്‍സിലറുമായ ശശി കണ്യാലില്‍, ജയേഷ് വി, പൊന്നമ്മ രവിന്ദ്രന്‍ എന്നിവര്‍ സംസാരിച്ചു.