അമ്പലപ്പുഴ: വീട്ടുമുറ്റത്ത് സൂക്ഷിച്ചിരുന്ന സ്‌കൂട്ടര്‍ തകര്‍ത്ത നിലയില്‍ കണ്ടെത്തി. വീടിനു നേരെയും ആക്രമണം ഉണ്ടായി. അമ്പലപ്പുഴ വടക്കു പഞ്ചായത്ത് ഒന്നാം വാര്‍ഡ് വണ്ടാനം ലൗ ലാന്റ് ജംഗ്ഷന് സമീപം വാടകയ്ക്കു താമസിക്കുന്ന ബിസ്മി മന്‍സിലില്‍ പോളിന്റെ കെ എല്‍ 04- എ കെ 1838 എന്ന ആക്ടീവ സ്‌കൂട്ടറാണ് തകര്‍ത്തത്.
കഴിഞ്ഞ രാത്രി 12-30 ഓടെയായിരുന്നു ആക്രമണം നടന്നത്. പൂട്ടിയിട്ടിരുന്ന ഗേറ്റ് തുറന്ന് അകത്തു കടന്ന സംഘം സ്‌കൂട്ടര്‍ തകര്‍ത്ത ശേഷം വീടിന്റെ ജനല്‍ച്ചില്ലകളും അടിച്ചു തകര്‍ത്തു. ശബ്ദം കേട്ട് വീട്ടുകാര്‍ ഉണര്‍ന്നപ്പോള്‍ ബൈക്കിലെത്തിയ സംഘം കടന്നുകളഞ്ഞു.
പോള്‍ നല്‍കിയ പരാതിയെ തുടര്‍ന്ന് പുന്നപ്ര പൊലീസ് കേസെടുത്ത് അന്വേഷണം ആരംഭിച്ചു.