വിദ്യാനഗര്‍: ചെര്‍ക്കളയില്‍ യുവാവിനെ കുത്തിപ്പരുക്കേല്‍പ്പിച്ച കേസില്‍ നിരവധി കേസുകളില്‍ പ്രതികളായ രണ്ടു പേരെ വിദ്യാനഗര്‍ സി.ഐ ബാബു പെരിങ്ങേത്തും സംഘവും അറസ്റ്റു ചെയ്തു. ചൂരിയിലെ എസ്.കെ അനീസ്(23), എതിര്‍തോട് കണ്ണാടിപ്പാറയിലെ എന്‍.എ സഹദ് (20) എന്നിവരാണ് അറസ്റ്റിലായത്. ചെര്‍ക്കളയിലെ നൗഫലി(24)നെ കുത്തിപ്പരുക്കേല്‍പ്പിച്ച കേസിലാണ് അറസ്റ്റ്.
20നു രാത്രി ചെര്‍ക്കളയിലാണു സംഭവം. അന്നുച്ചക്ക് എടനീരിലെ തോട്ടില്‍ കുളിക്കാനെത്തിയ രണ്ടു സംഘങ്ങള്‍ തമ്മില്‍ വാക്കേറ്റമുണ്ടായിരുന്നു. ഇതിന്റെ തുടര്‍ച്ചയായാണ് രാത്രി അക്രമമുണ്ടായത്.
പിടിയിലായ സഹദ് നെല്ലിക്കട്ടയിലെ ലീഗ് ഓഫീസ് അക്രമിച്ച കേസിലും പൈക്ക ജുമാമസ്ജിദിന് സമീപം നിര്‍ത്തിയിട്ടിരുന്ന ഉസ്താദിന്റെ കാര്‍ തകര്‍ത്ത കേസിലും എടനീരില്‍ ബസ് ഡ്രൈവറെ അക്രമിച്ച കേസിലും പ്രതിയാണ്.
അനീസ് കാസര്‍കോട് പൊലിസ് സ്റ്റേഷന്‍ പരിധിയിലെ ഒന്‍പതു വര്‍ഗീയ സംഘര്‍ഷ കേസുകളിലും പ്രതിയാണെന്നു പൊലിസ് പറഞ്ഞു.