കട്ടപ്പന: മൂന്നംഗ കുടുംബത്തെ വീടുകയറി ആക്രമിച്ച കേസില്‍ തമിഴ്‌നാട് സ്വദേശികളായ എട്ടംഗസംഘം പിടിയില്‍. വണ്ടന്‍മേട് വിജയവിലാസം ഗുരുസ്വാമി, ഭാര്യ പോതമണി, മകന്‍ രതീഷ് എന്നിവരെ വീടുകയറി ആക്രമിച്ച കേസില്‍ തമിഴ്‌നാട് തേവാരം സ്വദേശികളായ രാജേന്ദ്രന്‍ (41), ജയപ്രകാശ് (27), പാണ്ഡ്യന്‍ (23), വിരുമാണ്ടി (21), സെല്‍വന്‍ (21), ശിവ (25), തങ്കപാണ്ടി (20), ജയകുമാര്‍ (24) എന്നിവരെയാണ് വണ്ടന്‍മേട് പൊലിസ് അറസ്റ്റുചെയ്തത്.
കഴിഞ്ഞ 18 ന് വണ്ടന്‍മേട് ഭാഗത്തെ വെയിറ്റിംഗ് ഷെഡില്‍ ബൈക്ക് പാര്‍ക്കുചെയ്യുന്നതുമായി ബന്ധപ്പെട്ട് പോതമണിയും കേസിലെ മുഖ്യപ്രതിയായ രാജേഷും ഭാര്യ നാഗലക്ഷ്മിയും വാക്കുതര്‍ക്കമുണ്ടായി. ഇതേക്കുറിച്ച് ചോദിക്കാനെത്തിയ രതീഷും രാജേഷുമായും തര്‍ക്കമുണ്ടായി. ഇതിന്റെ വൈരാഗ്യത്തില്‍ തമിഴ്‌നാട്ടില്‍നിന്ന് രാജേഷിന്റെ ബന്ധുക്കളെ വിളിച്ചുവരുത്തിയാണ് ഞായറാഴ്ച രാത്രിയില്‍  വീടാക്രമിച്ചത്. ബഹളംകേട്ട് നാട്ടുകാര്‍ എത്തിയപ്പോഴേയ്ക്കും രക്ഷപെട്ട പ്രതികളെ കമ്പംമെട്ട് ചെക്ക്‌പോസ്റ്റില്‍ പൊലിസ് പിടികൂടുകയായിരുന്നു.