അടിമാലി: കുഞ്ചിത്തണ്ണി ഫെഡറല്‍ ബാങ്കിനു സമീപം പ്രവര്‍ത്തിക്കുന്ന പൂജാ കറിപൗഡര്‍ കമ്പനി ഓഫീസില്‍ മോഷണം. അലമാരിക്കുള്ളില്‍ സൂക്ഷിച്ചിരുന്ന പത്തു സ്വര്‍ണനാണയങ്ങള്‍ മോഷണം പോയതായി കമ്പനി അധികൃതര്‍ പറഞ്ഞു. വെള്ളത്തൂവല്‍ പൊലിസ് കേസെടുത്ത് അന്വേഷണമാരംഭിച്ചു.
ഇന്നലെ രാവിലെ കമ്പനി തുറക്കാനെത്തിയ മാനേജരാണ് കമ്പനിക്കുള്ളിലെ ക്യാബിന്റെ വാതില്‍ തുറക്കാതെ ഫൈബര്‍ ഷീറ്റുകള്‍ ഇളക്കി മാറ്റിയിട്ടിരിക്കുന്നതായി കണ്ടത്.
തുടര്‍ന്ന് പൊലിസില്‍ വിവരമറിയിക്കുകയായിരുന്നു. തുടര്‍ന്നുനടത്തിയ പരിശോധനയിലാണ് സമ്മാന പദ്ധതി പ്രകാരം വിതരണം ചെയ്യാന്‍ ക്യാബിനുള്ളിലുള്ള മേശയില്‍ സൂക്ഷിച്ചിരുന്ന ഒരുഗ്രാമിന്റെ പത്ത് സ്വര്‍ണനാണയങ്ങള്‍ മോഷണം പോയതായി കണ്ടെത്തിയത്.
പുറകുവശത്തെ ഭിത്തിയില്‍ ഫാന്‍ പിടിപ്പിക്കുന്നതിനായി ഉണ്ടാക്കിയിരുന്ന വലിയ ദ്വാരത്തിലൂടെയാണ് മോഷ്ടാവ് അകത്തുകടന്നതെന്നു കരുതുന്നു.  
ശനിയാഴ്ച്ച കമ്പനി അടച്ചതിനുശേഷം ഞായറാഴ്ച്ച അവധിയായതിനാല്‍ ഇന്നലെയാണ് കമ്പനി തുറന്നത്.