കരുവാരക്കുണ്ട് : പഞ്ചായത്ത് 2017ല്‍ നടപ്പിലാക്കുന്ന വിവിധ പദ്ധതികളുടെ പ്രചാരണ പ്രവര്‍ത്തനങ്ങള്‍ക്ക് വാര്‍ഡ് 20 പുന്നക്കാട് തുടക്കമായി. കരുവാരക്കുണ്ട് ഗവ:ഹയര്‍ സെക്കന്‍ഡറി സ്‌കൂളിലെ എന്‍.എസ്.എസ് വാളണ്ടിയര്‍മാര്‍, ശ്രുതി ക്ലബ് പ്രവര്‍ത്തകര്‍, സദ്ഗമയ ക്ലബ് പ്രവര്‍ത്തകര്‍, പ്രതിഭ ഗ്രന്ഥശാല, സാമൂഹ്യ സന്നദ്ധ പ്രവര്‍ത്തകര്‍, രാഷട്രീയ പാര്‍ട്ടി പ്രതിനിധികള്‍ എന്നിവരുടെ സഹായത്തോടു കൂടിയാണ് പ്രചാരണം സംഘടിപ്പിക്കുന്നത്.
സമ്പൂര്‍ണ ശുചിത്വം, ജലസാക്ഷരത, ലഹരി നിര്‍മാര്‍ജന യജ്ഞം, യാചകനിരോധനം എന്നീ മേഖലകളാണ് പ്രധാന പ്രചാരണ വിഷയങ്ങള്‍. പ്രവര്‍ത്തനങ്ങളുടെ വിളംബരമായി പുന്നക്കാട് പ്രധാനവീഥികള്‍ എന്‍.എസ്.എസ് വിദ്യാര്‍ഥികളും ക്ലബ് പ്രവര്‍ത്തകരും ചേര്‍ന്ന് ശുചീകരിച്ചു. മിഷന്‍ അറ്റ് വാര്‍ഡ് 20 എന്ന് പേരിട്ട പ്രചാരണ പരിപാടി പഞ്ചായത്ത് പ്രസിഡണ്ട് കെ.മുഹമ്മദ് മാസ്റ്റര്‍ ഉദ്ഘാടനം ചെയ്തു.ജില്ലാ പഞ്ചായത്ത് അംഗം ടി പി അഷ്‌റഫലി മുഖ്യ പ്രഭാഷണം നടത്തി. വികസന കാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ പി ഷൗക്കത്തലി, പ്രിന്‍സിപ്പള്‍ കെ അജിത, എന്‍.എസ്.എസ് പ്രോഗ്രാം ഓഫിസര്‍ എം മനോജ്, ഗോപാലകൃഷ്ണന്‍, കെ.പി ശ്രീധരന്‍ സംബന്ധിച്ചു.