രാജാക്കാട്: രാജകുമാരി പഞ്ചായത്തിലെ ഏക ആദിവാസി കോളനിയായ ആടുവിളുന്താന്‍ കുടിയിലെ കുടുംബങ്ങള്‍ വാസയോഗ്യമായ വീടോ, പുറംലോകവുമായി ബന്ധപ്പെടാന്‍ സഞ്ചാരയോഗ്യമായ റോഡോ, കുടിവെള്ളമോ ഇല്ലാതെ ദുരിതക്കയത്തില്‍. അടിസ്ഥാന സൗകര്യങ്ങള്‍ ഏര്‍പ്പെടുത്തുമെന്നുള്ള അധികൃതരുടെ വാഗ്ദാനങ്ങള്‍ നാല്‍പ്പതുവര്‍ഷം പിന്നിടുമ്പോഴും യാഥാര്‍ഥ്യമായിട്ടില്ല.
തെരഞ്ഞെടുപ്പുകാലത്ത് മാത്രമെത്തുന്ന ഭരണാധികാരികള്‍ പിന്നിട് തങ്ങളെ തിരിഞ്ഞുനോക്കാറില്ലെന്ന് കാടിന്റെ മക്കള്‍ പറയുന്നു. മുതുവാന്‍ സമുദായത്തില്‍പ്പെട്ട ഇരുന്നൂറോളം കുടുംബങ്ങളാണു അരനൂറ്റാണ്ടായി ഈ കോളനിയില്‍ കഴിയുന്നത്. പഞ്ചായത്തിന്റെ വടക്കേ അതിരില്‍ ഉയര്‍ന്ന മലനിരകളില്‍ ചിതറിക്കിടക്കുന്ന കോളനിയിലേയ്ക്ക് എത്താന്‍ ആകെയുള്ളത് കുടിയേറ്റകാലത്ത് നിര്‍മിച്ച മണ്‍റോഡ് മാത്രമാണ്.
ഉരുളന്‍ പാറകളും കുണ്ടും കുഴിയും കൊടുംവളവുകളും കയറ്റിറക്കങ്ങളും നിറഞ്ഞ കാട്ടുപാതയിലൂടെ വേനല്‍ക്കാലത്തുപോലും ജീപ്പുകള്‍ക്ക് മാത്രമെ സഞ്ചരിക്കാനാകൂ.
മഴ പിടിക്കുന്നതോടെ പുറംലോകത്തുനിന്നും തികച്ചും ഒറ്റപ്പെടുന്ന ഇവിടേയ്ക്ക് ഒരു വാഹനത്തിനും എത്താനാകില്ല. രോഗികളും പ്രായംചെന്നവരുമാണു ഇതുമൂലം ഏറെ കഷ്ടപ്പെടുന്നത്. രോഗംമൂലം അവശനിലയിലാകുന്നവരെ കസേരകളിലും മറ്റും തലച്ചുമടായി എടുത്ത് മെയിന്റോഡുവരെ കൊണ്ടുചെന്നുവേണം വാഹനങ്ങളില്‍ കയറ്റി ആശുപത്രിയിലെത്തിക്കാന്‍.
വഴിയുടെ ദുര്‍ഘടാവസ്ഥമൂലം മഴക്കാലത്ത് കുട്ടികളുടെ വിദ്യാഭ്യാസം മുടങ്ങുന്നതും പതിവാണ്. കുടിയിലെ കാര്‍ഷികോല്‍പ്പന്നങ്ങള്‍ മാര്‍ക്കറ്റിലെത്തിക്കുവാന്‍ പറ്റത്തതിനാല്‍ കിട്ടുന്ന വിലയക്ക് ഇടനിലക്കാര്‍ക്ക് വില്‍ക്കേണ്ടിയുവരുന്നു.
ഭൂരിഭാഗം കുടുംബങ്ങളും കഴിയുന്നത് ജീര്‍ണിച്ച് നിലംപതിക്കാറായ കൂരകളിലാണ്. വേനല്‍മഴയില്‍ ചോര്‍ന്നൊലിക്കുന്ന ഇവ കാലവര്‍ഷത്തെ അതിജീവിക്കാനിടയില്ല. ത്രിതല പഞ്ചായത്തുകള്‍ രണ്ടുലക്ഷം രൂപവീതം ഭവനനിര്‍മാണ സഹായം നല്‍കിയെങ്കിലും തുകയുടെ അപര്യാപ്തത മൂലം പണി പൂര്‍ത്തീകരിക്കുവാന്‍ സാധിച്ചിട്ടില്ല. വാഹനസൗകര്യം ഇല്ലാത്തതിനാല്‍ നാലുകിലോമീറ്ററോളം നിര്‍മാണ സാമഗ്രികള്‍ തലച്ചുമടായി ചുമന്നുകൊണ്ടു വരണം. ഇതിനു വേണ്ടിവരുന്ന ഭാരിച്ച ചെലവാണു പണി പൂര്‍ത്തീകരിക്കുവാന്‍ തടസമാകുന്നത്.    
കുടിയിലെ കുടുംബങ്ങങ്ങള്‍ക്ക് ശുദ്ധജലവും പൂര്‍ണമായി ലഭിക്കുന്നില്ല. മലമുകളില്‍ നിന്നും ഹോസുകളില്‍ കൊണ്ടുവരുന്ന വെള്ളമാണു ഉപയോഗിക്കുന്നത്.
വേനല്‍ക്കാലത്ത് ആവശ്യത്തിനു വെള്ളം ലഭിക്കാറുമില്ല.