പൊന്നാനി: പത്തുകോടി രൂപ ചെലവില്‍ പൊന്നാനി ഈശ്വരമംഗലത്ത് നിര്‍മിക്കുന്ന ഇന്‍ഡോര്‍ സ്റ്റേഡിയം കോംപ്ലക്‌സ് കേരള ഇന്‍ഫ്രാസ്ട്രക്ചര്‍ ഇന്‍വെസ്റ്റ്‌മെന്റ് ഫണ്ട് ബോര്‍ഡിന്റെ ( കിഫ്ബി) പരിഗണനയിലേക്ക് . സ്‌പോര്‍ട്‌സ് കൗണ്‍സില്‍ പ്രസിഡന്റ് ടി പി ദാസന്റെ അധ്യക്ഷതയില്‍ ചേര്‍ന്ന ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് ഇത് സംബന്ധമായ തീരുമാനമായത് . അടുത്ത മാസം ചേരുന്ന കിഫ്ബി ഡയറക്ടര്‍ ബോര്‍ഡ് യോഗത്തിന്റെ പരിഗണനയില്‍ ഇത് ചര്‍ച്ചചെയ്യും. പൊന്നാനി എം എല്‍ എ കൂടിയായ സ്പീക്കര്‍ പി ശ്രീരാമകൃഷ്ണന്റെ താല്‍പര്യപ്രകാരമാണ് ജില്ലാ സപോര്‍ട്‌സ് കൗണ്‍സില്‍ വിവിധ ഉദ്യേശ്യങ്ങളോടുകൂടിയുള്ള ഇന്‍ഡോര്‍ സ്റ്റേഡിയത്തിന്റെ പദ്ധതി തയ്യാറാക്കിയത് .
കുട്ടികള്‍ക്കായുള്ള പരിശീലന കേന്ദ്രം ഉള്‍പ്പെടുന്നതാണ് പദ്ധതി . പൊന്നാനി നഗരസഭയുടെ കീഴിലുള്ള ഈശ്വരമംഗലത്തെ മിനിസ്റ്റേഡിയത്തോട് ചേര്‍ന്നാണ് ഇന്‍ഡോര്‍ സ്റ്റേഡിയം നിര്‍മിക്കുക . 3.1 ഏക്കര്‍ സ്ഥലമാണ് ഇതിനുവേണ്ടിവരിക. മിനി സ്റ്റേഡിയം 1.47 ഏക്കര്‍ സ്ഥലത്താണ് സ്ഥിതിചെയ്യുന്നത് .ശേഷിക്കുന 1.63 ഏക്കര്‍ സ്റ്റേഡിയത്തോട് ചേര്‍ന്ന് റവന്യൂവകുപ്പിന്റേതായിട്ടുണ്ട്. ഈ സ്ഥലം വിട്ടുകിട്ടാന്‍ നടപടി തുടങ്ങിയിട്ടുണ്ട് . ഇക്കഴിഞ്ഞ ബജറ്റില്‍ 10 കോടി രൂപയാണ് പദ്ധതിക്ക് വകയിരുത്തിയത് .
ഇന്‍ഡോര്‍ സ്റ്റേഡിയത്തിന് പുറമെ ട്രീറ്റ്‌മെന്റ് പ്ലാന്റ്, കബഡി കോര്‍ട്ട് , മാര്‍ഷല്‍ ആര്‍ട്ട് സെന്റര്‍ , കഫ്തീരിയ ബ്ലോക്ക് , കുട്ടികള്‍ക്കായുള്ള ഫുട്‌ബോള്‍ കോര്‍ട്ട് , ടെന്നീസ് ,വോളിബോള്‍ കോര്‍ട്ടുകള്‍ ,സിന്തറ്റിക് ട്രാക്, ബാസ്‌കറ്റ് ബോള്‍ കോര്‍ട്ട് ,സ്‌കാറ്റിംഗ് ഫീള്‍ഡ് എന്നിവ പദ്ധതിയുടെ ഭാഗമായി ഒരുക്കും .കൂടാതെ ലാന്‍ഡ് സ്‌കോപ്പിംഗും ,ചാറ്റുമതിലും നിര്‍മിക്കും. കുട്ടികള്‍ക്കുള്ള പാര്‍ക്കും നിര്‍മിക്കുന്നുണ്ട് . വിവിധ മത്സരങ്ങള്‍ക്ക് സൗകര്യമൊരുക്കുന്ന ഇന്‍ഡോര്‍ സ്റ്റേഡിയം യാഥാര്‍ഥ്യമാകുന്നതോടെ മലബാറിന്റെ കായികഭൂപടത്തിലേക്ക് പൊന്നാനിയും കടന്നു വരും.