തൊടുപുഴ: കഞ്ചാവുമായി പിടിയിലായ ശേഷം എക്‌സൈസ് സംഘത്തെ കബളിപ്പിച്ചു കടന്ന പ്രതിയെ എക്‌സൈസ് സംഘം സാഹസികമായി കീഴടക്കി. ഒരാഴ്ച മുമ്പാണ് കേസിനാസ്പദമായ സംഭവങ്ങളുടെ തുടക്കം. കഞ്ചാവ് കേസുകളിലെ പ്രതിയായ ഇടവെട്ടി ശാസ്താംപാറ കുന്നുപുറത്തില്‍ അനന്ദു(19)ആണ് തൊടുപുഴ എക്‌സൈസ് സംഘത്തിന്റെ പിടിയിലായത്. കഴിഞ്ഞ 16 ന് പഴുക്കാകുളത്തിനു സമീപത്തു നിന്നും അനന്ദു എക്‌സൈസ് സംഘത്തെ കബളിപ്പിച്ച് രക്ഷപെടുകയാണുണ്ടായത്.
സംഭവം എക്‌സൈസിനു നാണക്കേടായിരുന്നു. തുടര്‍ന്ന് എക്‌സൈസ് ഡെപ്യൂട്ടി കമ്മിഷ്ണര്‍ കെ.എ നെല്‍സന്റെ നിര്‍ദേശ പ്രകാരം പ്രതിയെ പിടികൂടാന്‍ പ്രത്യേക സ്‌ക്വാഡ് രൂപീകരിച്ച് നടത്തിയ അന്വേഷണത്തിലാണ് കഴിഞ്ഞദിവസം രാത്രി പ്രതിയെ കോടിക്കുളത്ത് നിന്നും പിടികൂടിയത്.
മഫ്തിയിലെത്തിയ എക്‌സൈസ് സംഘം ഒരു മണിക്കൂറോളം പരിശ്രമിച്ചാണ് പ്രതിയെ വലയിലാക്കിയത്. കോടിക്കുളത്തെ ഒരു വീട്ടില്‍ ഒളിവില്‍ കഴിഞ്ഞിരുന്ന ഇയാള്‍ എക്‌സൈസിനെ കണ്ടു വീണ്ടും രക്ഷപ്പെടാന്‍ ശ്രമിക്കുന്നതിനിടെ സാഹസികമായാണ് പിടികൂടിയത്. വിദ്യാര്‍ഥികള്‍ക്കിടയില്‍ കഞ്ചാവ് വില്‍പ്പനയുണ്ടെന്ന വിവരത്തെ തുടര്‍ന്നാണ് എക്‌സൈസ് സംഘം അനന്തുവിനെ പിടികൂടിയത്. പ്രതിയില്‍ നിന്നും എക്‌സൈസ് സംഘം 10 ഗ്രാം കഞ്ചാവും കണ്ടെത്തിയിരുന്നു. ബാക്കി സൂക്ഷിച്ചിരിക്കുന്ന സ്ഥലംകാണിച്ചുനല്‍കാം എന്ന് പറഞ്ഞാണ് മുതലക്കോടത്ത് എത്തിച്ചശേഷം പ്രതി കടന്നത്. എക്‌സൈസ് സംഘത്തിന്റെ പരാതിയില്‍ പൊലിസും പ്രതിയെ തിരഞ്ഞ് വരികയായിരുന്നു. തൊടുപുഴ എക്‌സൈസ് സര്‍ക്കിള്‍ ഓഫിസിലെ ഇന്‍സ്‌പെക്ടര്‍ ഷാജു ഫ്രാന്‍സിസ്, ഇന്റലിജന്‍സ് ഓഫിസര്‍ ബിന്‍സാദ്, ഉദ്യോഗസ്ഥരായ ഫ്രാന്‍സിസ്, പ്രകാശ്, അജിത്ത്, സുബൈര്‍ എന്നിവരടങ്ങിയ സംഘമാണ് പ്രതിയെ പിടികൂടിയത്.