മുത്തങ്ങ: വേദനസംഹാരി ഗുളിക, കഞ്ചാവ് കടത്ത് എന്നിവയുമായി ബന്ധപ്പെട്ട് മുത്തങ്ങയില്‍ രണ്ടുപേര്‍ പിടിയില്‍. വേദനസംഹാരി ഗുളിക കടത്തിയ കോഴിക്കോട് കുറ്റിച്ചിറ സ്വദേശി എ.വി ബദറുദ്ദീ (38)നും കഞ്ചാവ് കടത്തിയതിന് ബത്തേരി പഴേരി സ്വദേശി കെ.ടി പ്രദീപു (51)മാണ് പിടിയിലായത്.
ബദറുദ്ദീന്‍ മുത്തങ്ങ തകരപ്പാടിക്കു സമീപം വാഹന പരിശോധനയിലാണ് എക്‌സൈസിന്റെ പിടിയിലായത്. ഗുണ്ടല്‍പേട്ടയില്‍ നിന്നും ബത്തേരിക്ക് വരികയായിരുന്ന കെ.എസ്.ആര്‍.ടി.സി ബസിലെ യാത്രക്കാരനായിരുന്നു ഇയാള്‍. ഒരു മാസം മുന്‍പ് ഇയാളെ വേദനസംഹാരി ഗുളികയുമായി പിടികൂടിയിരുന്നു. കോഴിക്കോട് നഗരത്തിലെ വിദ്യാലയങ്ങള്‍ കേന്ദ്രീകരിച്ച് മയക്കുമരുന്ന് വിതരണം നടത്തുന്ന സംഘത്തിലെ അംഗമാണു ഇയാള്‍. ഇയാളില്‍ നിന്ന് 600 സ്പാസ്‌മോ പ്രോക്‌സി വോണ്‍ പ്ലസ് കാപ്‌സ്യൂളുകളൂം 15 ആള്‍പ്രാസോളം ഗുളികകളുമാണ് പിടികൂടിയത്.
മൈസൂരുവിലുള്ള മെഡിക്കല്‍ ഷോപ്പുകളില്‍ നിന്നും യാതൊരു നിയന്ത്രണവുമില്ലാതെ ലഭിക്കുന്ന ഗുളികകള്‍ കോഴിക്കോട്ടെത്തിച്ച് വന്‍ വിലക്കാണ് ആവശ്യക്കാര്‍ക്ക് വിതരണം ചെയ്യുന്നത്. എക്‌സൈസ് കമ്മീഷണരുടെ സ്‌ക്വാഡിന്റെ രഹസ്യവിവരത്തെ തുടര്‍ന്ന് വയനാട് സ്‌പെഷ്യല്‍ സ്‌ക്വാഡിലെ എക്‌സൈസ് ഇന്‍സ്‌പെക്ടര്‍ ആര്‍.പി സുജിത്തിന്റെ നേതൃത്വത്തിലായിരുന്നു റെയിഡ്.
മുത്തങ്ങ പൊന്‍കുഴിയില്‍ വെച്ച് 50 ഗ്രാം കഞ്ചാവുമായാണ് പഴേരി സ്വദേശി കെ.ടി പ്രദീപ് പിടിയിലാവുന്നത്. ഇയാള്‍ ഗുണ്ടല്‍പേട്ടയില്‍ നിന്നും കഞ്ചാവു വാങ്ങി പൊന്‍ കുഴി ഇറങ്ങി മറ്റൊരു ബസില്‍ കയറി ബത്തേരിക്ക് കയറുവാനായി കാത്തിരിക്കവേയാണ് പിടിയിലായത്.
എക്‌സൈസ് ഇന്‍സ്‌പെക്ടറോടൊപ്പം പ്രിവന്റീവ് ഓഫിസര്‍മാരായ പി.എസ് വിനീഷ്, കെ.ജി ശശികുമാര്‍ സി.ഇ.ഒമാരായ കെ രമേഷ്, കെ.കെ അജയകുമാര്‍, റഷീദ് വിപിന്‍ പുഷ്പാംഗദന്‍ എന്നിവരുമുണ്ടായിരുന്നു. പ്രതികളെ ബത്തേരി ജുഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കി.