പത്തനംതിട്ട: ശബരിമല മാളികപ്പുറം ക്ഷേത്രത്തിന് സമീപം ഞായറാഴ്ചയുണ്ടായ തിക്കിലും തിരക്കിലും 31 തീര്‍ഥാടകര്‍ക്ക് പരുക്ക്. ഞായറാഴ്ച സന്ധ്യക്ക് 6.40 ന് തങ്ക അങ്കി ചാര്‍ത്തിയുള്ള ദീപാരാധനയ്ക്ക് ശേഷമായിരുന്നു അപകടം.
ഗുരുതരമായി പരുക്കേറ്റ എട്ടുപേരെ വിദഗ്ധ ചികിത്സയ്ക്കായി കോട്ടയം മെഡിക്കല്‍ കോളജ് ആശുപത്രിയിലേക്ക് മാറ്റി.
വടക്കേ നടയിലെ ബാരിക്കേഡ് മറിഞ്ഞതാണ് തിക്കും തിരക്കും അധികമാകാന്‍ കാരണമായത്. തമിഴ്‌നാട്, ആന്ധ്ര, തെലുങ്കാന എന്നിവിടങ്ങളില്‍ നിന്നുള്ള തീര്‍ഥാടകര്‍ക്കാണ് പരുക്കേറ്റത്. മലയാളിയായ സുഭാഷ്(51), കാളി(56) എന്നിവര്‍ക്കും പരുക്കേറ്റിട്ടുണ്ട്. മൂന്ന് പേരെ പത്തനംതിട്ട ജനറല്‍ ആശുപത്രിയിലും 18 പേരെ സന്നിധാനം ആശുപത്രിയിലും പ്രവേശിപ്പിച്ചു. പമ്പ ആശുപത്രിയില്‍ ചികിത്സ തേടിയ രണ്ടുപേര്‍ ഇന്നലെ ആശുപത്രിവിട്ടു.
പരുക്കേറ്റവരുടെ ചികിത്സാചെലവ് പൂര്‍ണമായും സര്‍ക്കാര്‍ വഹിക്കുമെന്ന് ദേവസ്വംമന്ത്രി കടകംപള്ളി സുരേന്ദ്രന്‍ അറിയിച്ചു. അപകടത്തില്‍പ്പെട്ടവരെ സന്നിധാനത്തു നിന്നും ആംബുലന്‍സിലാണ് പമ്പയില്‍ എത്തിച്ചത്.
ജില്ലാ കലക്ടര്‍ ആര്‍. ഗിരിജ, സബ് കലക്ടര്‍ പ്രേംകുമാര്‍ എന്നിവരുടെ മേല്‍നോട്ടത്തിലായിരുന്നു രക്ഷാപ്രവര്‍ത്തനം. ശബരിമലയില്‍ ഇത്തവണ സുരക്ഷ ഒരുക്കുന്നതിന് കേന്ദ്ര സേനകളുടെയും സംസ്ഥാന പൊലിസിന്റെയും സംയുക്ത പ്രവര്‍ത്തനം തുടക്കം മുതല്‍തന്നെ ഇല്ലാതിരുന്നത് അപകടത്തിനു കാരണമായെന്നാണ് പ്രാഥമിക വിലയിരുത്തല്‍.
ഇതില്‍ പൊലിസിനുണ്ടായ വീഴ്ചയാണ് പ്രധാനമെന്നും അഭിപ്രായമുണ്ട്. അപകടം നടന്ന വടക്കേനടയില്‍ ദുരന്തനിവാരണ സേനയിലെ 31 പേര്‍ ജോലിക്കുണ്ടായപ്പോള്‍ പൊലിസ് സേനയിലെ ഒമ്പതുപേര്‍ മാത്രമാണ് ഉണ്ടായിരുന്നത്. ദുരന്തനിവാരണ സേനയുടെ സന്ദര്‍ഭോചിത ഇടപെടലാണ് കൂടുതല്‍ ദുരന്തം ഉണ്ടാകാതിരിക്കാന്‍ കാരണമെന്നും അപകടത്തിനു സാക്ഷികളായ ഭക്തരും വ്യക്തമാക്കുന്നു. മുന്‍പത്തേക്കാള്‍ കൂടുതല്‍ തിരക്കുണ്ടായിട്ടും പൊലിസ് മുന്‍കരുതല്‍ സ്വീകരിച്ചില്ലെന്നും ആരോപണമുണ്ട്. എന്നാല്‍ ആരോപണം മന്ത്രി തള്ളി.
കഴിഞ്ഞ 40 ദിവസമായി വന്‍തിരക്കാണ് അനുഭവപ്പെട്ടത്. ഇതുവരെ നല്ലനിലയില്‍ കാര്യങ്ങള്‍ കൈകാര്യം ചെയ്യാന്‍ ദേവസ്വം ബോര്‍ഡിനും വിവിധ വകുപ്പുകള്‍ക്കും കഴിഞ്ഞു. ഇത്തരം അപകടങ്ങള്‍ ഭാവിയില്‍ ഉണ്ടാകാതിരിക്കുന്നതിനുള്ള ശാസ്ത്രീയ ക്രമീകരണങ്ങളെക്കുറിച്ച് ആലോചിക്കുമെന്നും മന്ത്രി പറഞ്ഞു.