ന്യൂഡല്‍ഹി: അഗസ്റ്റ വെസ്റ്റ്‌ലന്റ് ഹെലികോപ്റ്റര്‍ ഇടപാടില്‍ മുന്‍വ്യോമസേനാ തലവന്‍ എസ്.പി ത്യാഗിക്ക് ജാമ്യം അനുവദിച്ചു. ഡല്‍ഹി പട്യാല കോടതിയാണ് ജാമ്യം അനുവദിച്ചത്. പ്രത്യേക വ്യവസ്ഥകളോടെയാണ് അദ്ദേഹത്തിന് കോടതി ജാമ്യം അനുവദിച്ചത്. ഇതില്‍ പ്രധാനമായുള്ളതാണ് രാജ്യം വിട്ടു പോകരുതെന്നത്.
തന്റെ അധികാരം ഉപയോഗിച്ച് അഗസ്റ്റ വെസ്റ്റ്‌ലന്റിന് അനുകൂലമായി നിലപാട് സ്വീകരിച്ചുവെന്ന് കണ്ടെത്തിയാണ് അദ്ദേഹത്തെ കഴിഞ്ഞ 17ന് പൊലിസ് അറസ്റ്റ് ചെയ്തിരുന്ന്. രാഷ്ട്രപതി, പ്രധാനമന്ത്രി തുടങ്ങി വി.ഐ.പികള്‍ക്ക് സഞ്ചരിക്കാനായി 12 ഹെലികോപ്ടര്‍ വാങ്ങാനുള്ളതായിരുന്നു കരാര്‍.
6000 അടി ഉയരത്തില്‍ പറക്കല്‍ശേഷി ഉണ്ടാകണമെന്ന സാങ്കേതിക നിബന്ധന ഇടപാട് നടക്കുന്ന സമയത്ത് വ്യോമസേന മേധാവിയായിരുന്ന എസ്.പി. ത്യാഗി ഇടപെട്ട് 4500 അടിയായി കുറച്ച് അഗസ്റ്റവെസ്റ്റ്‌ലാന്റിന് കരാര്‍ കിട്ടാന്‍ വഴിയൊരുക്കിയെന്നാണ് സി.ബി.ഐ അന്വേഷണത്തില്‍ കണ്ടത്തെിയത്.  
അഗസ്റ്റവെസ്റ്റ്‌ലാന്റ് കമ്പനിയുടെ ഇടനിലക്കാരുമായി എസ്.പി. ത്യാഗിയും ബന്ധുക്കളായ സഞ്ജീവ് ത്യാഗി, രാജീവ് ത്യാഗി എന്നിവരും പലതവണ കൂടിക്കാഴ്ച നടത്തിയെന്നും കോഴപ്പണം കൈപ്പറ്റിയതിന് തെളിവുണ്ടെന്നും സി.ബി.ഐ പറയുന്നു. കരാര്‍ തുകയുടെ 12 ശതമാനം വരുന്ന കോഴപ്പണം തുനീസ്യന്‍ കമ്പനിയില്‍നിന്ന് മൗറീഷ്യസ് വഴി ഇന്ത്യയില്‍ ത്യാഗിയുടെ ബന്ധുക്കളിലേക്ക് എത്തിയെന്നും സി.ബി.ഐ അന്വേഷണത്തില്‍ വ്യക്തമായിരുന്നു.