ബാലുശ്ശേരി: നന്മണ്ട - നരിക്കുനി റോഡില്‍ നിരന്തരമായി അപകടങ്ങളുണ്ടാകുന്ന അമ്പലപ്പൊയിലിലെ റോഡിലേക്ക് തള്ളി നില്‍ക്കുന്ന മരങ്ങള്‍ മുറിച്ചു മാറ്റിത്തുടങ്ങി. ഇരുപതോളം അപകടങ്ങളിലായി ഇവിടെ ഒന്‍പതു പേര്‍ക്ക് ജീവന്‍ നഷ്ടമായിട്ടുണ്ട്.
പതിനഞ്ചോളം ആളുകള്‍ അതിന്റെ ദുരിതത്തില്‍ ജീവഛവമായി കഴിയുന്നു. അപകടങ്ങള്‍ക്ക് ശാശ്വത പരിഹാരം കാണുന്നതിന് പ്രദേശവാസികള്‍ മുന്‍കൈയെടുത്താണ് ഇപ്പോള്‍ മരങ്ങള്‍ മുറിച്ചു മാറ്റിക്കൊണ്ടിരിക്കുന്നത്.
കമ്മിറ്റി രൂപീകരിച്ച് ബോധവല്‍ക്കരണ ക്ലാസുകള്‍, അപകടങ്ങള്‍ക്ക് കാരണമാകുന്ന കല്ലുകളും മറ്റും നീക്കം ചെയ്ത് റോഡരികുകള്‍ ശുചീകരിക്കല്‍ തുടങ്ങിയ പ്രവര്‍ത്തനങ്ങള്‍ നടത്തിക്കൊണ്ടിരിക്കുകയാണ്.