പെരിന്തല്‍മണ്ണ: ശുചിത്വസന്ദേശങ്ങള്‍ കൈമാറി ക്രിസ്മസ്ദിനത്തില്‍ എന്‍.എസ്.എസ് വളണ്ടിയര്‍മാരുടെ ശുചിത്വ വിളംബരജാഥ കൗതുകമുണര്‍ത്തി.
ജീവനം പദ്ധതിയുടെ ഭാഗമായി നടക്കുന്ന എന്‍.എസ്.എസ് വളണ്ടിയര്‍മാരുടെ ഏഴു ദിവസം നീണ്ടു നില്‍ക്കുന്ന ശുചിത്വ ക്യാംപിന്റെ മുന്നോടിയായിട്ടാണ് ശുചിത്വ വിളംബര ജാഥകള്‍ സംഘടിപ്പിച്ചത്.നഗരസഭയിലെ 34 വാര്‍ഡുകളും കേന്ദ്രീകരിച്ച് നടന്ന വിളംബര ജാഥകളില്‍ എന്‍.എസ്.എസ്, സന്നദ്ധ പ്രവര്‍ത്തകര്‍, നാട്ടുകാര്‍, കുട്ടികള്‍, യുവജനങ്ങള്‍ എന്നിവര്‍ അണിനിരന്നു.
ശുചിത്വ സന്ദേശങ്ങളടങ്ങിയ പ്ലാക്കാര്‍ഡുകള്‍, ബലൂണുകള്‍, വാദ്യഘോഷങ്ങള്‍ എന്നിവ വിളംബര ജാഥക്ക് നിറം പകര്‍ന്നു. വിളംബര ജാഥകള്‍ക്ക് നഗരസഭാ ചെയര്‍മാന്‍ എം മുഹമ്മദ് സലീം, വൈസ് ചെയര്‍മാന്‍ നിഷി അനില്‍ രാജ്, പ്രതിപക്ഷ നേതാവ് താമരത്ത് ഉസ്മാന്‍ ,സ്ഥിരംസമിതി അധ്യക്ഷന്‍മാരായ പത്തത്ത് ആരിഫ്, കെ.സി മൊയ്തീന്‍ കുട്ടി, പി.ടി ശോഭന, എ രതി, കിഴിശ്ശേരി മുസ്തഫ, വിവിധ വാര്‍ഡു കൗണ്‍സിലര്‍മാര്‍, എന്‍.എസ്.എസ് പ്രോഗ്രാം ഓഫിസര്‍മാര്‍, രാഷ്ടീയനേതാ എന്നിവര്‍ നേതൃത്വം നല്‍കി.