തിരൂരങ്ങാടി: അനധികൃത മണല്‍തോണികള്‍ പൊലിസ് സാഹസികമായി പിടികൂടി. കടലുണ്ടിപ്പുഴ പാറക്കടവില്‍ നിന്നുമാണ് ഇന്നലെ കാലത്ത് 11 ന് തിരൂരങ്ങാടി എസ്.ഐ വിശ്വനാഥന്‍ കാരയില്‍ രണ്ടു മണല്‍ തോണികള്‍ പിടികൂടിയത്. പൊലീസ് സ്ഥലത്തെത്തുന്നതോടെ തോണികള്‍ പുഴയില്‍ മുക്കി രക്ഷപ്പെടുകയും പിന്നീട് തോണി കരയ്‌ക്കെടുക്കുകയും ചെയ്യുന്ന പ്രവണത ഇന്നലെ എസ്. ഐ തകര്‍ക്കുകയായിരുന്നു.
മുക്കത്തുകടവില്‍ മണലോടു കൂടിയും പാറക്കടവില്‍ മണല്‍വാരാനുള്ള ഉപകരണങ്ങളോടും കൂടിയുമാണ് തോണികള്‍ പിടികൂടിയത്. പിടിച്ചെടുത്ത തോണികള്‍ എസ്.ഐ തന്നെ തുഴഞ്ഞു കരയ്ക്കടുപ്പിച്ചു. ആറുമാസം മുമ്പ് തിരൂരങ്ങാടി പ്രിന്‍സിപ്പല്‍ എസ്.ഐ ആയി ചാര്‍ജ്ജെടുത്ത വിശ്വനാഥന്‍ ഇതിനകം പതിനൊന്ന് അനധികൃത മണല്‍തോണികള്‍ പിടികൂടിയിട്ടുണ്ട്.