കോതമംഗലം: വനമേഖലയിലെ പുഴയില്‍ നിന്നും തോട്ട ഉപയോഗിച്ച് മീന്‍പിടിച്ച സംഘത്തിലെ ഒരാള്‍ പിടിയില്‍.നാല് പേര്‍ ഓടി രക്ഷപ്പെട്ടു. പൂയംകുട്ടി വനത്തിലെ കുരുന്ന്‌മേട് വെള്ളച്ചാട്ടത്തിന് സമീപം പുഴയിയില്‍ തോട്ട ഉപയോഗിച്ച് മീന്‍പിടിക്കുകയായിരുന്ന അഞ്ചഗ സംഘത്തിലെ നേര്യമംഗലം ആവേലിചാല്‍ പുളിചോട്ടില്‍ ബിനുവിനെയാണ് വനപാലകര്‍ പിടികൂടിയത്.സംഘത്തിന്റെ കൈവശമുണ്ടായിരുന്ന തോട്ടകളും പിടിച്ച മത്സ്യവും കണ്ടെടുത്തിട്ടുണ്ട്.
കുട്ടംപുഴ റേഞ്ചിലെ പൂയംകുട്ടി ഫോറസ്റ്റ് സ്റ്റേഷനിലെ വനപാലകര്‍ ബീറ്റിനിടയിലാണ് സംഘത്തെ വനത്തില്‍ കണ്ടത്. വനപാലകരെ കണ്ട് സംഘം ഓടി രക്ഷപ്പെടാന്‍ ശ്രമിക്കവേയാണ് ഒരാളെ വനപാലകര്‍ സാഹസികമായി പിടികൂടിയത്. ഏറെ പാരിസ്ഥിതിക പ്രധാന്യമുള്ള പൂയംകുട്ടി വനമേഖലയുടെ ഉള്‍ഭാഗത്തായിട്ടുള്ള പുഴയുടെ ഭാഗത്തേക്ക് നാട്ടുകാരോ വനപാലക രോ സാധാരണ എത്താറില്ല.
ആന ഉള്‍പ്പെടെയുള്ള വന്യ ജീവികളുടെ വിഹാരകേന്ദ്രമാണിവിടം. ഈ സൗകര്യം കണ്ടാണ് സംഘം ഇവിടെ മീന്‍ പിടിക്കാനെത്തിയത്. ഓടി രക്ഷപ്പെട്ടവര്‍ക്കായി അന്വേഷണം ആരംഭിച്ചതായി വനപാലകര്‍ അറിയിച്ചു. പിടിയിലായ ബിനുവിനെ കോടതിയില്‍ ഹാജരാക്കി.