അമ്പലപ്പുഴ: മതമൈത്രിയുടെ സന്ദേശമുണര്‍ത്തി അമ്പലപ്പുഴ ശ്രീകൃഷ്ണാ സ്വാമി ക്ഷേത്രത്തില്‍ എരുമേലി വാവര് പള്ളി ഭാരവാഹികള്‍ അന്നദാനം നടത്തി. ഇന്നലെ ഉച്ചയ്ക്കാണ് അയ്യപ്പഭക്തര്‍ക്കം ക്ഷേത്രത്തിലെത്തിയ ഭക്തര്‍ക്കുമായി പള്ളി ഭാരവാഹികള്‍ അന്നദാനം നടത്തിയത്.
ജമാഅത്ത് പ്രസിഡന്റ് പി.എ ഇര്‍ഷാദ് ഭദ്രദീപ പ്രകാശനം നിര്‍വഹിച്ചു.
അയ്യപ്പഭക്തര്‍ക്കായി അന്നദാനം വിളമ്പി നല്‍കിയതിനുശേഷം ഇവര്‍ക്കൊപ്പം പള്ളി ഭാരവാഹികള്‍ ഭക്ഷണവും കഴിച്ചാണു മടങ്ങിയത്.
ജമാഅത്ത് സെക്രട്ടറി എം.എം യൂസഫ് , സി.വി അബ്ദുല്‍ ഖരീം, വൈസ് പ്രസിഡന്റ് വി.പി അബ്ദുല്‍ ഖരീം, ജോയന്റ് സെക്രട്ടറി കെ.എം നൗഷാദ്, കെ.എ ഷാജഹാന്‍ എന്നിവരും വാവരുടെ പ്രതിനിധിയായി പങ്കെടുത്തു.
സമൂഹപ്പെരിയോര്‍ കളഞ്ഞില്‍ ചന്ദ്രശേഖരന്‍ നായര്‍ അമ്പലപ്പുഴ അയ്യപ്പ ഭക്തസംഘ ഭാരവാഹികളും ഇവര്‍ക്കൊപ്പം ഉണ്ടായിരുന്നു.