തിരൂരങ്ങാടി: കൊടിഞ്ഞി പുല്ലാണി ഫൈസല്‍വധക്കേസില്‍ റിമാന്‍ഡില്‍ കഴിയുന്ന ഗൂഢാലോചനാ കേസിലെ പ്രതികളുടെ ജാമ്യാപേക്ഷ നാളെ കോടതി പരിഗണിക്കും. ബി.ജെ.പി, ആര്‍.എസ്.എസ് പ്രവര്‍ത്തകരായ എട്ട് പ്രതികളുടെ ജാമ്യാപേക്ഷയാണ് പരപ്പനങ്ങാടി കോടതി പരിഗണിക്കുന്നത്. കോഴിക്കോട് സബ്ജയിലില്‍ റിമാന്‍ഡില്‍ കഴിയുകയാണിവര്‍. ഫൈസലിന്റെ സഹോദരി ഭര്‍ത്താവ് കൊടിഞ്ഞി ചുള്ളിക്കുന്ന് പുല്ലാണി വിനോദ് (39), ഫൈസലിന്റെ മാതൃസഹോദര പുത്രന്‍ പുല്ലാണി സജീഷ് ( 32), കൊലപാതകത്തിന്റെ മുഖ്യ സൂത്രധാരന്‍ പുളിക്കല്‍ ഹരിദാസന്‍ (30), ഇയാളുടെ ജ്യേഷ്ഠന്‍ ഷാജി (39), ചാനത്ത് സുനില്‍ (39), കളത്തില്‍ പ്രദീപ് ( 32), പാലത്തിങ്ങല്‍ പള്ളിപ്പടി സ്വദേശി ലിജീഷ് എന്ന ലിജു (27), പരപ്പനങ്ങാടി സ്വദേശിയും വിമുക്തഭടനുമായ കോട്ടയില്‍ ജയപ്രകാശ് (50) എന്നിവരാണ് കോടതിയില്‍ ജാമ്യാപേക്ഷ സമര്‍പ്പിച്ചിട്ടുള്ളത്.
കഴിഞ്ഞമാസം 27നാണ് ഇവര്‍ അറസ്റ്റിലായത്. ഇതിനുമുന്‍പും ജാമ്യത്തിനായി ശ്രമിച്ചിരുന്നെങ്കിലും കോടതി അപേക്ഷ തള്ളിയിരുന്നു. കേസില്‍ ഇത് വരെ കൃത്യം നിര്‍വഹിച്ച മൂന്നുപേര്‍ അടക്കം പതിനൊന്ന് പേരാണ് അറസ്റ്റിലായത്. കേസില്‍ മറ്റുപ്രതികള്‍ എന്ന് പറയപ്പെടുന്ന തിരൂര്‍ തൃക്കണ്ടിയൂര്‍ മഠത്തില്‍ നാരായണന്‍, തിരൂര്‍ കുട്ടിച്ചാത്തന്‍കാവ് വിപിന്‍ദാസ്, ഗൂഢാലോചന സംഘത്തിലെ വളളിക്കുന്ന് സ്വദേശി ജയകുമാര്‍ എന്നിവരെ പിടികൂടാനുണ്ട്്. സംഭവശേഷം ഒളിവില്‍ കഴിയുന്ന ഇവര്‍ക്ക് വേണ്ടിയുള്ള അന്വേഷണം ഊര്‍ജിതപ്പെടുത്തിയതായി അന്വേഷണസംഘം പറഞ്ഞു.
ഇസ്‌ലാംമതം സ്വീകരിച്ചതിന്റെ പേരില്‍ കഴിഞ്ഞ 19നാണ് ഫൈസല്‍ കൊടിഞ്ഞി ഫാറൂഖ് നഗറില്‍ വെട്ടേറ്റുമരിച്ചത്. ദൗത്യം നിര്‍വഹിച്ച കേസിലെ പ്രതികളായ തിരൂര്‍ മംഗലം പുല്ലാണി കരാട്ടുകടവ് സ്വദേശി കണക്കല്‍ പ്രജീഷ് എന്ന ബാബു (30), വള്ളിക്കുന്ന് അത്താണിക്കല്‍ മുണ്ടിയംകാവ് പറമ്പ് സ്വദേശി പല്ലാട്ട് ശ്രീജേഷ് എന്ന അപ്പു(26), നന്നമ്പ്ര വെള്ളിയാമ്പുറം ചൂലന്‍കുന്ന് സ്വദേശിയും തിരൂര്‍ പുല്ലൂണിയില്‍ താമസക്കാരനുമായ തടത്തില്‍ സുധീഷ് കുമാര്‍ എന്ന കുട്ടാപ്പു (25) എന്നിവര്‍ ജാമ്യത്തിന് അപേക്ഷ സമര്‍പ്പിച്ചിട്ടില്ലെന്നാണ് വിവരം.